من العاشق الصغير إلي كل ألاعضاء والزوار

من طرف **العاشق الصغير** 2012-05-11, 4:49 pm

تذكير بمساهمة فاتح الموضوع :

تلاقيت نا وياه .......... ماشي وجنبه ماشيين ضناه
الغايـــب بعد مُده
امعاه عويله ............. قابل وكانت غايتي نمشيله
انسلم عليه ونعاتبه ونحكيله ........... ليش الغياب وليش طال جفاه
واذكرت كي ريته اسنين جميله ........... أياماً وهو فاضي ونا مشكاه
كنا انتلاقوا كل يوم وليله ........... وماضي توارى كنت فيه امعاه
وانقطعن أخباره وين شال رحيله .......... عليـّا تباعد كنت جار احذاه
ودورت واجد ما لقيت وسيله .......... ونحسابه الغالي ما يطول رجاه
واليوم قابل بوعيون كحيله .......... وما حس كي ماريت من يالاه
صفقت بيديا ونا نوميله ........... وانقول في سري الله الله
امعاه أصغاره .......... غض النظر واطى عليا أنظاره
عديت شوره ودمعتي منهاره .......... وتميت نمشي فالطريق وراه
تمتمت كلمه قلتله عِباره .......... وعاودت شَريط الزمان امعاه
حاولت نحكيله انجيب إشاره .......... وانجيب ذكرى اتذكره بغلاه
لكن تبينلي من عيونه اخساره .......... ناسي الماضي وكل ما قلناه
ولا جاب مني شئ في تذكاره .......... وحتى كلامي ما فهم معناه
مديت يدّي وقلتله ببصاره ......... كل شئ درته فالحياة تلقاه

مابت البال تفــارق

مابت البال تفــــــــــــــــــــــــارق...............صورة عزيز النوم مني سارق

حتى وهيه بعيـــــــــــــــــــــــــده...........تخطر فلانه كل صبح آكيـــــــــده

وتسبق اوقات النوم فمواعيــــده...........لين خاطري ماعد اقدر ينساهــــــا

مقهور من صغا ليام جاير كيـــــــــده...........هيه انغنت عدّت وهوه بلاهـــــــــا

ذايق امرارالوقت وتمرميــــــــــــــده..........وخطور طيفها وقلّة العين هناهـــــا

وماعاد عنده ف الحياه جديــــــــــــده..........عايش يعاود في قديم غلاهــــــــــــا

ضاقت عليه الواسعه من ريــــــــــده..........اللي الياس عن شبحه بعيد زواهــــا

حتى بعد غنواها............مابت تفارق خاطري ذكراها.............معاي سالمة

مابت البال تفــــــــــــــــــــــــــارق...............صورة عزيز النوم مني سارق

ومقلّل هناي وزاد كبدي حــــــــارق...............وملازم العين وجاي دون غطاها

حتى وهو غني عنّي بعيد وغــــارق...............فهموم واجده نفسى وراه خذاها

ما والفت لآخر اللي ما فـــــــــارق...............يماطل وما غيّر نهار اريــــــــاها

متمكّن غلا لــــــــــوّل امبيّن زارق...............ويظهر ولو مليّت غيوم سمــــاها

صحيح خلّت الخاطر شارق...............وغنيّت ولكن عاز من يسواهــــــا

حتى بعد غنواها............مابت تفارق خاطري ذكراها.............معاي أفلانه

تحيـــــــــــــــــــــــاتي
أخوكــــم
العاشــــــــ الصغير ــــــــــــــــــــــق

من طرف **العاشق الصغير** 2012-08-02, 4:03 am

يا خطيب الجمعه .. مازال عندي في الغوالي طمعه ..ادعي امعايا

ياخطيب ادعيلي .. ايجيني اللي كاين زها قنديلي
اللي ثلات اثلات قاسم ليلي .. وماعاد تنزل من عيوني دمعه

مانبيش دموع .. ايسيلن ويبقى خاطري مليوع
ونبقى نهار وليل ناصب نوع .. على الي اشواقي دوم له مجتمعه

يا خطيب الجمعه .. مازال عندي في الغوالي طمعه ..ادعي امعايا

يا خطيب الجامع ...سوا سر ولا جهر ربى سامع...ادعى معايا يا خطيب الجامع

ارفع ايديك امعايا..استجيب للدعاء يا الله يا مولايا
حليله بشرع الله هوا رجايا..يالى بغلاها دوم رانى طامع
______

يا خطيب الجامع ...سوا سر ولا جهر ربى سامع...ادعى معايا يا خطيب الجامع

ليلى ثلاثه افروعه..حزن ودمع واشوق بعد اللوعه
لاينتسى لا ينقفل موضوعه..لين يرتفع الاذان من الصوامع
______
يا خطيب الجامع ...سوا سر ولا جهر ربى سامع...ادعى معايا يا خطيب الجامع

من طرف **العاشق الصغير** 2012-08-02, 4:05 am

مافيه داعـى تنشدينى كنك .. وانتي عـارفه كل المواجع منك

انتـي عارفه مطرايا .. يا الخايله يم العيون سهايا

ولافيه داعـى تجبدى سهرايا .. لسـوال منطرح لنظار ما لامنـَك

وايباتن عيونى ساهـرات كبايا .. زعـاله انكان ردن وما حقنك

انتـي عارفه موضوعه .. وانت اسباب شقـاه يـادلوعه

ليش هو سوالك تجبدى في نوعه .. وتجددى جروحه وين برين منـك

مقسوم بين ياساته و نار اللوعه .. وصابر ومامنه سـوايا جنـك

يابوزاعــى .. انتي عارفه قصة اسباب اوجاعى

سـوالك اللى قلتيه ماله داعى .. ســوى بودعه والاّ تخابل ظنك

وما خافيه عنك جميع اوضاعى .. من يـومن رحلتى والخطا ساقنك

سـوال رميتـى .. لارد منى لاجـواب خذيتى

مشاعـر قـديمه خافيه حاييتى .. وشاشـن انظارى وين مـا شافنك

الهن قبل كى شبه الاطلال ابقيتى .. خطـرتى عليهن وين ماراعنك

ومافيـه داعـى تنشدينى كنك .. وانتي عـارفه كل المواجع منك

من طرف **العاشق الصغير** 2012-08-02, 4:06 am

يا العين جاك الليل .. وسيلي على غالي قريب إيشيل

وأخذي غايتك يا العين

***

بلا توصاي **أنريدك أتسيلي يا العين أمعاي

مايجيك من شوري ولا نهّاي **ألاّ قول زيدي وألطمي بلحَيل

وقولي عزيز وقرعتي وأمناي **خذينا على قـُربه نوَى الرحيل

ونا زاد خلّيني على مطراي **وأنقول يا بعيد الدار ، يا العزيل

اللي وين ما نزعل إيجي رضّاي **أبروحه أبروحه مايعوز رسيل

مازلت في قولي وله وفـّاي **وحق من قهر قوّة أصحاب الفيل

واقف أبثقلي ما أنحسّ أعداي **وأسّاع ينظروا مني أمرار الويل

أنجيهم ونا عابي أبكلّ أعباي **خبير فـ المعارك ما انهاب ثقيل

واخذ على قولت تعالى جاي ** متوكّل على مولاي هو الوكيل

وأتجي عيلتي جملة بلا تبطاي **أمعاي يفزعوا ديما بلا تعطيل

وأنردّوا اللي عدّت بشوق غلاي **بقوّة أسلاح وجيّدات الخيل

واللي فيه داير خير مو نسّاي **أردود السلَف ديما أكفاء وجميل

واللي صاحبي ديما وعارف داي **وعنده على ميعاد صوب خليل

أنريده يشاركني بلا توراي **وعارف كلامي ما عليه إيخيل

واللي عمر ما جرّب ومو غوّاي **إيقول ساهله ، هابا عليك هبيل

بناره كوَاني مالها طفـّاي ** بها ضرّني لاني جهَد لا حيل

رجيته وما جابه عزيز أرجاي **وتمّت الناس أمغير قال وقيل

جرينا وما ساعد الله أخطاي **وتمّا إيباعد بينّا الدليل

دعينا وما حقـّق الله أدعاي ** وعنده احكامه خافيه الجليل

أخساره اليوم امعاه ضاع شقاي ** أنسيني وخلاّني ودار بديل

ما احسبت ياغالي أتعيش بلاي ** وفي دار غيري تشعله قنديل

حتى أنت بأعيالك ونا بضناي ** خلّيني أنشوفك مااتكون بخيل

وين مااعدّي قبل دير عزاي ** ميّت ونا ميّت بلا تغسيل

من طرف **العاشق الصغير** 2012-08-02, 4:06 am

يا ريــــــــت مــا رينـــــــاك

يا ريــــــــت مــا رينـــــــاك ........ عندي العقل ما يحمل نهار بلاك
ويش درتلا
خديــــــــــــــت أذنـوبـــــــــــــــي ........ بينـــك وبيــن الله يا محبــوبـي
نا كنت متريح وعايش دوبــــــــي ........ ويش جيبك ويش جابنــي يالاك
نين بالغلا تميت داي وصـوبــــــي........ ولازم عليا نجبدا مـــدعــــــــاك
وتميت قوتي ونت هومشروبـــــي ........ وما نريــد فالدنيا أمفيت أرضاك
وتميت صيدي ونت هو مطلوبـــي ........ وطاش أنضــاري يا عزيز وراك
تلاقن أسلوبك فالحياة إسلوبــــــي ........ واللي تحس بيه انحس بيه معاك
وعارف أدروبك خاطيات أدروبــي ........ وعارف ضناي امواسين ضنـاك
وما زلت في شانك انحت أجيوبـي ........ ومازلت ماسـك فيك ما ننســـاك
وما زلت في شانك انشن حروبــي ........ ونعـادي جميع الناس في سباك
يا قرعتـي ياقسمـي يا مكتوبـــــي ........ جابك الله وجيت ما نخطـــــــاك

من طرف **العاشق الصغير** 2012-08-02, 4:07 am

عليه شعورك .. امواجك خذني في غريق ابحورك ..

ياعقل عبرلي عليه شعورك

يخطر زوله .. ايجنك غدايد ماالزمان وهوله

عليك وين ما يرخي الليل إسدوله .. كوابيس في عز المنام اتزورك

اتنوض منفجع تاخذ الليل إبطوله .. متكدي إمعاك اتكيدني بسمورك

عليك يخطرن لوهام تاخذ جوله .. فيهن وهن منهن اسباب ظمورك

في وطن ما تسمع صهيل إخيوله .. تاخذ الخلاء تبحث علي مطمورك

إتخمم إتريد اللي صعيب اوصوله .. إبحكمك ظلمت العين في دستورك

وياعقل عبرلي عليه شعورك

طالقين اسراحك .. غوالي انحازو كاسرين جناحك

ياعقل مطامن عزقت اسلاحك .. احتلو مكاناتك وكل إقصورك

متعالي عليهم في الخفاه اصياحك .. نين عاالعدم متلايمات اكسورك

مستسلم إلهم مني خذوه سماحك .. الله ايسامحك فيهم بذرت إبذورك

واليوم إحصدوك وسيبو مطراحك .. في وطن مجدب رامظات إجذورك

وغابو وهفّني اليوم ارياحك .. وغايب علي جرحك دواء دكتورك

ياعقل عبرلي عليه شعورك

من متذكر .. منهم اللي غابو وفيش إتفكر

علي دار هلها سيبوها سكر .. بيبانها مالك ومال أسهورك

فيها وجوك كي اللي متعكر .. من موحك عطاشا ذابلات إزهورك

مستعجل علي لوهام جيت إمبكر .. وبيدك علي جرحك إتحك إقشورك

جميل تقبله عاالعين يامتنكر .. إنريدك إتوّلع في ظلامي نورك

وياعقل عبرلي عليه شعورك

يااللي عامر ,, ونا عارفك ياعقل ديما ثامر

ويش داس في صدرك وعني طامر . أقرالي اللي مدسوس بين اسطورك

انخاف ماالزمان امعاي تبقا دامر .. ويطيرن وراء هم الزمان إطيورك

عليش في الحياه ديما اعيونك حامر .. وامسلف بدال الخير كل اشرورك

جضيضك هويد الليل يااللي سامر .. ياعقل ما تجني الا مخسورك

ياعقل عبرلي عليه شعورك

امواجك خذني في غريق ابحورك

من طرف **العاشق الصغير** 2012-08-02, 4:09 am

هاضا حوله

قولة ابري وانسيت فيها قوله

اليوم احتفل بالجرح .. هاضا حوله

احتفل بأحزاني

عدا عليهن عام خش الثاني

لا نسيت لا فكرت في نسياني

رايم الهم وعايشه بأوصوله

غيابك قتلني * وهدني * ولغاني

تمت طريقي فالحياة مجهولة

اليوم احتفل * واقبل إهداء وتهاني

بعد عشت في جرحك العام بطوله

احتفل بجروحي

هالعام مشّيته بلاك بروحي

عايش فحزني وفــــ شقاي ونوحي

والياس واخذني معاه فـــ جولة

خليتني كاره حياتي وروحي

عــ الناس تمت دنيتي معزولة

العام كمل

حقيت فــ أيامه شقا وزعل

اليوم احتفل * عامي الثاني طل

ولجروح من عامي هضك * منقوله

لا بريت ولا هــ الهم خف وقل

حتى عيوني بالبكا مشغولة

ومازلت نفرح بيك وين تهل

والمرتبة مازلت واخذ لولة

اليوم احتفل * كل شي فيا انشل

تحسابني عايش أدوار بطولة

تحسابني صامد صمود جبل

عايش معيشة بالنكد منتولة

من طرف **العاشق الصغير** 2012-08-02, 4:10 am

عليش جاحده ياروح ماجظيتى.... إلا من كبيره فالفواد كميتى

ياروح مادردرتى.... الامن كبيره فالفواد حجرتى

وين خاطرى جوه اصفى عكرتى.... ابضيق فالنفس راحه مع تنهيتى

مامن كواين واجدات نظرتى.... فالخير والزهى مامن عجب حقيتى

لا بخير عمرك مشيتك غيرتى.... ولا ابقل ميجودك اصحاب جفيتى

كيان خاطرى جحداك به دمرتى.... بالله سهريلي بما راعيتى

عليه انصلى.... وذكره نبينا فالهموم ايجلى

انتى هولى بالك التبن اتخلى.... فوق من شعيرى اتفوتنى ابليتى

ساهل ومو واعر وفيدك حلى.... حلال للمشاكل وماتفك لويتى

اديرلى قصيده بها الناس اتسلى.... بالحيل كان كبرت عليك قضيتى

تضربلى امثال اسماح وتهللي.... تقنعنى اتخلى امصيبتى تسليتى

عرمي ع الديسه.... وحتى افراش السوء له تكنيسه

انتى كيلى جدت عليك حسيسه.... ياروح ماعمرك ابها شاكيتى

اصحى ابليس النفس وتوسويسه.... و أوعى اتكونى في اخطاه مشيتى

و أوعى ايغرك رونقه أو بصيصه.... توطى اتضلى كان فيه وطيتى

وناالصيت عندى كى الجوهرة النفيسه.... صحيح نا اللى فانى وباقى صيتى

و يجن اوقات تفصيلك انقول انقيسه.... نلقاه لو ثوبى ولا طاقيتى

عليش جاحده ياروح ماجضيتى.... من كبيره فالفواد كميتى

من طرف **العاشق الصغير** 2012-08-02, 4:11 am

عـــلـــي خــاطــرهـــا &&& العين ياللّـي شالـت امعـاك نظرهـا

تـواضــع الـهــا وانـشــد

تـواضــع الـهــا يـاغـالـــــــــــــــــى &&& عليها عليش ابغطرسه متعالــــــــــــــى

ما تريـد تبقـى كـل يـوم اتشالـــــي &&& وراك وانت مو حاسب احساب ضررها

العين فارقت مامـن اوجـوه غوالــي &&& وكم جرح من جـر الغـلا ساطرهــــــــا

تـواضــع الـهــا وانـشـدهــــــــــــــــــا &&& وسيـب اللـي قدامـهـا وبعـدهـا

وهيت م الكلام اللـي انجـا يسعدهـا &&& حتـى والوجـوه اتبـان بموايـرهـا

مانـك اللـي كـي لولـى زاهـدهــــا &&& وساحـب مع الدنيـا ودوج بشـرهـا

ولا نك اللي كي لولـي جاحدهـــــــــا &&& حكاية غـلا شـارب قطيـر زهرهـا

واليوم من جفاك ومن عكاس سعدهـا &&& العين ضاع يابسها وضاع خضرها

تـواضــع الـهــا كنـيـــــــــــــــــــــبـهـا &&& ايروق بالهـا بالـك ايخـف نحيبهـا

لاجل سريبـك يـا عزيـز سريبهــــــــا &&& مشغال سر طربتها و سـر , كدرهـا

لوكان تلقطـه مـن فجرهـا لمغيبهــا &&& تذكـارك دوا فـى لولـه وآخـرهـا

واليوم مى علـى بالـك ولا تدريبهـــــا &&& ولا نك اللـي فـى حالهـا ناكرهـا

روف ابـــحـــالـــهــــــــــــــــــــــــــا &&& وتواضع الهـا ونشـد ورد اسوالهـا

ولا تـريـد تبقـالـك ولا تبقالـــــــــهـا &&& الدنيا فنـت واجـد ..قديـم جررهـا

ولاانقـولـك عيـنـى دوا تلقالـهـــــا &&& مامـن اللـي فيهـا جـرا وقهرهـا

ماعمر شى ردن اعطـاش ارسالهـا &&& شراب سيلها عـم الابيـار غمرهـا

ولاعمـر حطـت عالهزيـل اثقالهـــا &&& ايشيل غير فالحمل الثقيـل ظهرهـا

ومقاديـر مازالـن اعـزوم اجمالهـا &&& اشـداد فالشدايـد كل شـى تقـدرهـا

تـواضــع الـهــا واحكيـلـهـــــــــــــــا &&& وجود بيش ماتقدر ابها واصغيلهـا

واحسـب مقاليـب الايـام وميلـهــــا &&& واعـرف البـذره قبـل مـا تبذرهـا

ونكان مي على بالـك العيـن دليلهـا &&& ايعاود على قولـت بعـد خطّرهـا

عـــلـــي خــاطــرهـــا &&& العين ياللّـي شالـت امعـاك نظرهـا

تـواضــع الـهــا وانـشــد

من طرف **العاشق الصغير** 2012-08-02, 4:12 am

**
طولت فى موحى وهو مابان ...لاجى قال اخطيت لاغلطان
***
طولت هو ماجانى...والقلب صاف اصياف تم ايعانى
لابعت مرسوله وبه واسانى ..مادار قدامه ايام زمان
ايام دايرنى احبيب دانى ..ويام هو ناشف مني حنان
ايام فاتحله ابواب اجنانى..هميلة ويرتع فــ صوبنة مطمان
واليوم شم ربيع فى مكين تانى ...عيب الكفاءايردوه بنسيان
طولت فى موحى وهو مابان ...لاجى قال اخطيت ولاغلطان
**
طولت طول بطوله...ولحباب ماقلوش هى نمشوله
والليل زاد اطوال طول طوله...عليا ونا لشوفته ظران
وهيالها هــ العين تشبح زوله...وهيالها ترجع ايام زمان
اللى الروح مشتاقة بلاه ذبوله..معاه مابتنفع قولت اللوكان
ومعاه صوبنة الباين بطل مفعوله...لاعاد ينفع قل لاجيبان
امغير من الماجع عقلى نهض بقوله...من اللى سمهم فايت ارقى المسلان

من طرف **العاشق الصغير** 2012-08-02, 4:14 am

حتى وهو جفاكم شين

شارب مره

عزاز عندكم عندى مساحه حره

حتى وهو جفاكم شين

ما ننساكم

ولا نهونكم لا نحمله فرقاكم

ولاانريد لا نرضى بديل غلاكم

اعزاز ذكركم جبده هناء ومسره

حتى ونا ما قادر انطيق جفاكم

انكابر انخاف الخافيا اتعره

رهين جرح من جر الغلا وخطاكم

وشي مالزمان ومن بلاه وزره

مازلت بيكم فارح

اكبار عندكم عندى فضا ومطارح

حتى وهو جفاكم شين قلبي جارح

اعزا قدركم ما يوم ينقص ذره

غلاكم اتقول امعاى صار البارح

عليه من هذيك ومن هذي نطّرا

ما تقبلها العين جفوت اللي فالغلا دللها

لكن اتقول ابرادتى انحملها

لي عزم ما عمره خذلنى مره

ارضا للضمير وللغلا والهلها

ارضا الكل من دارت عليها جره

ويطير مالقلوب الزاعلات زعلها

هي اتروق والخاطر ايفضى سره

من طرف **العاشق الصغير** 2012-08-02, 4:15 am

بروحك معا روحك مزعل روحك

مليان يا قلبي وداس جروحك

داس اهمومك...

مليوع ما والي ايريد ايلومك

رفعت رايتك قيسك علنت اهزومك

واغلبت في عند الاقسام وموحك

تنازلت من ضعفك علي مرسومك

وارضيت لخساره بدال اربوحك

وطاحن معا كثرة ابكاك نجومك

عاندتني مني رفضت انصوحك

وهبن علي عقلي ارياح انسومك

حيرتني يا قلب رافض بوحك

غلطان لو قتلك قدرت انعومك

تعلى عليك الموج كسّر لوحك

بقيت امبلم...

بنفسك معا نفسك بديت اتكلّم

منهار لحزانك تبان امسلم

دموعك علي خدك وكاثر نوحك

ليلك طويل مندمس ومظلّم

وفيه لالامك طلقت اسروحك

لابيت تاخذ درس لا اتعلم

زهدت في الدنيا نسيت طموحك

احساسك رحل لا وادعك لا سلم

خلاك تمشيه الطريق بروحك

من طرف **العاشق الصغير** 2012-08-02, 4:15 am

الله الله ماكان العشم ... سريب غلاي تنسو يااقدم

مادرت اعتبار ... اتديرو عيب في وضح النهار

عميتو عين حقتكم اكبار...عصرتو قلب في ايديكم الكم

في احساس دمرتو دمار...ماعد في الاحساس انعدم

وعندي حب يملى في ابيار...قطرة فيه ماعد فيه تم

وعندي غوط مكسي بالثمار...عليه جراد سيتكم هجم

وعندي بيت ماعمرا اندار...طرطشتوه ماعد شي التم

عقاب الليل جا لما اعصار...ننضر فيه قدامي برم

ابقيت انجول ماعندي اديار...ونبرك وين ماليلي ايعم

ونوم العين ماعد زار طار...الليل ابكا واعياط انقسم

دارت في خونتكم مدار...مليتو بير عقلي نين جم

طعمه شين نلقنا امرار...ذقته كيف تجريعة السم

خنتو ليش خالفتو المسار؟...واسفاه اه يالا الندم

الله الله ماكان العشم ... سريب غلاي تنسو يااقدم

تنسو كل شي...مانحساب ترضو هك في

نفضتو ليش في لحضة ايدي؟...ونا بالقو متمسك ابكم

ننسى قلت ماهنتو علي...امغير كلام موهالب الفم

قلبي قلب مايغدر وفي...عطاكم عهد مايغدر بصم

يالولاف مانكم شي اشوي...راكم فيّ في مجرى الدم

مايحتاج حبي الكم دي...الي ماشاف لون الورد شم

وانّي اليوم حي وموش حي...علي انعيش في سجن انحكم

ضلام دميس ماريتا الضي...ننسى هم يخطر كم هم

اقبال العين سيتكم اتجي...موس انسن وانحط افلحم

الله الله ماكان العشم ... سريب غلاي تنسو يااقدم

من طرف **العاشق الصغير** 2012-08-02, 4:20 am

مانك لي

ارهنتي ودرتي كبد مانك لي , , , ننزف وجرحك م النزيف ابري

مانك صوبي , , , ولا عاد دروبك من مسار دروبي

نا البخت كايدني وخلوة جيبوبي , , , م الياس وقتي مانهار اخلي
نا الياس في عمري وفي مكتوبي , , , نا الياس حثى في المنام يجي
نا الياس قاصدني ودوبه دوبي , , , تحلف رشاوي في غلاي اعطي

ياسمحة التمهيدة , , , ابريتي ونا جرحي اكثر تبديده

ينضّح وسايل من احذا الضميده , , , سطير نين جاري م السطير اوعي

ارهنتي ابقيتي ع المنال بعيدة , , , وياسك حصل ماعد يجيبك ديّ

بختك رايم , , , نا احصلت في جرحي وجرحك لايم

ابقيتي دواه ونا نزيفي دايم , , , ولا عد دواء غيرك يفيد بشي

جنيت جرح منك ياعيون الحايم , , , لا طب جابه لايفيده كيّ

ولا عد يهبّن من احذاك نسايم , , , ولا انظن في بالك غلاي اطري

وطوحة ديارك من لطوط قسايم , , , جايّات وغيابك مخلف فيّ

ولا قدرت كي ننوي نجيهن حايم , , , اللي قبل نمشي شورهن ونجي

مازهاك عدمت , , , ولا اخطيت في حقك نهار اجرمت

عليش هكّذي تقسي ونا سلّمت , , , لك كل شي ماسيبت عندي شي

واتعبت في شانك زهاي احرمت , , , وآمّنت لك وانت غدرت بي

نا قلت لك فيما مضى واقسمت , , , عندي الروح بيعتها فداك اشوي

ميّس فراقك يا امناي حتمت , , , وارضيت مقتنع والعقل بيك ابلي

وطاوي صفاحيّك غلاك ردمت , , , وناسي اللي منّك معاي اجري

ونغيب كم عام عليك لا مااندمت , , , ويوم جيّتي بكري ضناك يجي

اليوم انتهى وضعي معاك حسمت , , , لا نلوم لاعندك ملام علي

نلوم ع الصغا والوقت كنّي لمت , , , وع القسم وظروفي وخلو ايدي

خير مانموت بأي شي عزمت , , , نرحل بجرحي من بلادك حي

من طرف **العاشق الصغير** 2012-08-02, 4:21 am

الله ايربحك لاتشغليلي بالي...خليني انتعلم ملتهي في حالي

لا اديري حوســــــــــــــــــــــــــه... خليه عقلي ملتهي في ادروسه

وخلي العواطف ف الخفا مدسوسه...قروه او غيه ما ايجن ياغالي

مشاعرجميله دافيه مدسوسه...صورتك بطول وعرض فيه خيــالي

غلانا حقيقه واضحه محسوسه...عايشــــينها يم النياب مجالي

والعشق فينا منتشر فيروســـه...لاطـــــــب جابه لا دوا هيالي

انريد شـــــــــــــــــــــــــــهاده ...وانريد انتمكن ف العلوم ازياده

يا اللي جمالك شي فوق العاده...مثيل القمر ضاوي ظلام اليالي

في ليل مطاول سواد ســــواده...بين السحاب وف البعيد ايلالي

نبقا شـــــــــــــــــــــــــــــــاكر...خليني ابروحي ملتهي وانذاكر

ما اقدرت انتأخر ع القرايه باكـــر...خايف انطـــــول ننطرد طوالي

مدير معهدي يبقا امعايا ماكـــــر...قانون ولوايـــح ما ايهما والي

ناوي السفر شورك خذيت تذاكر ...رحله طويله واليدين خـوالي

كي ننظرك نبقا مثيل الســــاكر...واللا مراكب في امواج عوالي

اطيوري ايريدن في دناك امواكر...والحر ماينزل الا ف العـــالي

من طرف **العاشق الصغير** 2012-08-02, 4:23 am

**في احساب الموته**

مدام بالجفاء بادر عزيز انفوته

ميت انعده

في اعداد الموته

**بين اقبوره**

حتى كي انخطم ما انتكي شوره

ويبقى اغيابه لي كيف احضوره

مالبال نحذفه حذفت ورق من نوته

ولاعاد يلزمني نهار انزوره

ولاعاد نبي يوم نسمع صوته

ما نالي ايمثل عليا دوره

انعطيه درس ما يفطن اللا ماحوتا

ايطيح بين نيران الجفاء مكبوره

نهايه آليمه اتكون هي تابوته

وانخليه عبره للجفاء مديوره

وانخليه يعبا من جديد او يوتا

هذا بيش يعرفها جميل الصوره

وقصه غرامه وخونته مثبوته

**من اعداد الموته **

من طرف **العاشق الصغير** 2012-08-02, 4:24 am

بعد هذي ما ريت شي زول خايل .. والخاطر ايحايل .. والعين مو راضيه بالبدايل
بعد هذي ما ريت شي مقعد ايطرب .. والخاطر ايجرب .. والعين في مشاريع صوبه تخرب
خطفها غلا زول منها مغرب .. اسماح المسايل .. لباسة الكابات فوق الخلايل
الشوعه اللي ديها بالتكرب .. غثيثها تمايل .. من حور الروايات جابت مثايل
وعينها كما عين فالت امدرب .. شاهين جايل .. سيوره زعابين فيهن جدايل
وزول طربز بالسماحه امسرب .. في العمايل .. اتجيب من تواصيف ريم الهمايل
كشكاره نبت في النقاعي امعرب .. معاه يتخايل .. انحس حس بارود منه جفايل

بعد هذي ماريت شي بنت زينه .. والخاطر خزينه .. اضايق بتنويح قلبه وعينه
محراثه معا نوس صادف دفينه .. معاها تخايل .. ايحوسن ف العدالات بين الحبايل
والصوره اللي مكانه في كنينه .. نقيشه دبايل .. يفوت جيل والعقل منها ايخايل
مطبوعه معا كل سمحه وشينه.. رسيمه جمايل .. نجام المشاهير قاري دلايل

بعد هذي ماريت شي زول غالي .. ومعاها خيالي .. حتي ف المنامات ديمه قبالي
حتي انكان ف الشعر ماني هلالي ..اسبل مالسبايل .. انقول في علل ينقلوه المقايل
غبا وين في نار سمح المجالي.. لموشه قصايل .. انداقه معا وطن دارت وحايل
مفحومه مطامير نار القبالي.. وصهد القوايل .. مع هبت الريح شاطن ولايل
عزيز مقعده قول ظني وبالي .. عليهم عتايل.. اللي ف التراكيب طاحو سطايل
مناجيه ما يرفعو راس والي .. خباث الخصايل .. لباسه اثياب البدع والرزايل
مثيل النساوين دارو مخالي .. خلقهم نسايل .. عليهم جميع الخزا والدفايل
قداها علي قنو ضمر عوالي .. نهار العكايل.. يخشو علي شايطات البلايل
علي كبوه النار والكور مالي.. يهدن صلايل..ايمشن ادموع النساء والزطايل
جناين علي جرف بردي مدالي .. شعرها سبايل .. وشفه دواء كيف ريق العسايل
وخدودها شلاليع مزن الليالي .. يديرن شلايل .. ابروقه مع زمهرير الهطايل
ربيعه كسا كل عامر او خالي .. نباتت بعايل .. كل هود في خوه لاخر ايشايل
مثيل الخدم فيه راضت متالي .. عرقها نصايل .. اتلاقي خذت في الوعاشي هايل
وانداوت حشف فوق تيغي قلالي .. انيابه صكايل .. يصرن كما .. مقط جرار عايل

من طرف **العاشق الصغير** 2012-08-02, 4:25 am

موتي خير ***** بعد انه غلا ريدي مشى للغير

ويش انريد حي

خير انموت *****.ولا تبكوا علي ولا اتشيلوا صوت

بعد انها مرادي هاللي احزام الكوت ***** خانت وما خافت احساب ضمير

والطعنه انجاتك من اقراب الخوت***** امعاها بالله ويش ادير
************************************
ويش انريد حي ***** .بذرنا اصواب وما جنينا شي

وفارقت احباب اليوم موش اشوي***** اجولت وما نلت الا تقهير

وعمرت فالصوب صرح لين اعلي***** لكن اعزازي فيه نوو تدمير

وكان متت راهي اسبابي هي***** خانت امعا سبق الاصرار والتفكير

اخذوا الثار خلوني انبات هني***** سوا بالسم والا بالسلاح خطير

وللا بلغوا خلوها للنيابه اتجي***** وحكم القانون فــ القضية ايصير
***********************************
يا بنات افكاري ***** موتن وماعاد ليكن قاري

اللي قبل بالله يحلف ايريد اشعاري***** اليوم علينا يالله ايقول افـ خير

ومر الامرار زاد فوق امراري***** حتى العسل في الريق تم مرير

انموت بعد انه ماو غلاها اصداري***** .سوا انجنح والا في السحاب انطير
***********************************
خلاص انسوني***** ولاتقبلو عزا في لاتبكوني

وبوسته قايل ميت ومادفنوني***** ونا انقول ردو علي جهير

ولا اتسالوا شن صار لا اتسالوني***** خلوني لسوال منكر امعاه انكير

وادعوا في الجنة ان شاء الله تلقوني***** وادعو المولى نبعد من لهيب سعير
************************************
ننقاني فديت ***** وجرعت من امرار الصوب لين ارويت

ما اتقول قبلها فالصوب غزلت لا سديت***** لا انجرحت لا عاود على سطير

لا اتقول بذرت لا حصدت لا ذريت***** امجرب ونا قاعد في الاعمار صغير

وودر دليلي لصوبها وليت***** اذهبت ونا كاين في الاصواب خبير

وعارف مسادي الباير ما ايديرن بيت***** وكسر الغلا ما ينفعه تجبير

وكيف الموت ما دوا لداي القيت***** موت ابعز خير من حياه بتكدير
**************************************
الموت شجاعه ***** واهناك بالعطش واهناك من ماتو جواعه

وهناك من اسبابه هاللي سفاه اقناعه***** سلّم استسلم طاع جاه اسير

اغدره باحراب سود شق اضلاعه***** لين اوصل في القلب فجره تفجير

وفيه من الغدر ميزته واطباعه ***** وفيه من اربي عالطيبه امنين صغير

وفيه من الشوق صيفه مرباعه***** وفيه من وفاه فيه اتحير

وفيه من تمنا الموت جاه قناعه ***** وفيه من ايخاف من المنايا اتغير

وفيه من قبره ضاقن عليه اوساعه***** وفيه من استاسع قبره بفعل الخير

وادعو المولى يختملنا بالطاعه ***** ويشفع فينا رسولنا البشير

من طرف **العاشق الصغير** 2012-08-02, 4:30 am

القوس قوسك وسهام سهامك**صوب احسبني حسبة هدف قدامك**علي ماتحن

القوس قوسك والرماح رماحك**صوب احسبني حسبة هدف لسلاحك

الحزن حزنك ولفراح افراحك**والود ودك ولخصام اخصامك

غالي وماهناك والي ايسد في مطراحك**مقامك رفيع وعاليات سوامك

القوس قوسك ديرها فحسابك**صوب عليا واشحطه نشابك

النعيم نعيمك والعداب عدابك**والشور شورك والكلام كلامك

امغير عندي طلب بعد اذن جنابك**حكّم ضميرك قبل نطق احكامك

القوس قوسك والنشان نشانك**صوب عليا يافريد زمانك

الصبر لجلك والعزوم عشانك**والحر حربك ولسلام سلامك

ارخي لجامك الهد علي بحصانك**الراس راسك والحسام حسامك

القوس قوسك واسيوف سيوفك**وامزاج مزاك والظروف ظروفك

رهو الشقا بعدك والهنا في شوفك**الهد عليا ماتشد الجامك

اللي ماتبيها غير هز اكتوفك**الكل تحت امرك ورهن ابهامك

من طرف **العاشق الصغير** 2012-08-02, 4:38 am

يقول الشاعر رجب الشيخى

مـا نشــدتـي كـنـي
كــذاب مـن جــاك وحـكــالـك عـنـي
خـذيـتـي الـكــلام

حكـوا بالـزيـف
خـذيـتـي الكـلام ومـا نشـدتي كـيف
اونا امعاك صادق ف الغرام نظيف
لا يــوم هـنـتـك لا فـقــدتــي حـنــي
لا انخـون لا نخـدع عـفيف شـريف
مـخـلـص اوافــي ف الـغـــلا لانــي
ولـو كـان يطلـع ما حـكـوا تخريـف
ناخـذ احـقــوقـي كـيف شـن ضمني

رد الشاعر نعيم الزوى

وين سمعتى
فيا خذيتى القــــول وأســرعتى
مـن غير غلطة دنيتـــى ودعتى
ودرتــــى السويا ياعزيزه منى
لو كان جيتى او كلمتى طاوعتى
راكى مشيتى و خاطــرك متهنى
ويمكن ابعذرى ف الغلا اقتنعتى
ويمكن فهمتى وماعلى أتضنى
لكن اخساره صـــــــوبنا ضيعتى
وهكى النهاية اتكون مو متمنى

من طرف **العاشق الصغير** 2012-08-02, 4:42 am

ماخطرتش على بالك يوم---تسأل وتنشد عني
ونا عيني مالفها نوم------معاك مادارت خطاء نا انضني
حرام تهجر وتقسى-------وتجفى بعد حبيتك
وحرام تغدر وتنسى-----كلمه بها وديتك
وتطوي دفاتر صوبي
ماتقول يامحبوبي---------معاي الغلآ متمني
--------------------------------------------------
ماكان العشم----------فيديك يذبل وردي
ولاكان العشم-------تنسى وتخلف وعدي
وايش السبب------ما كنا رفاقة صوب
ويش السبب-------ماكنا ونس في دروب
وايش غيرك-----ياهل ترى مني سوايا جنك
وايش بدلك------والله ظروف الزمان خذنك
ماكان ع البال تخطر----بعد رفقة اسنين طويلة
ترحل بعيد وتهجر-------مابين يوم وليلة
ويش لاقي علي-----ممعاك عيبة درت
انا طبعي وفي------ مافي الغلآقصرت
وديتك بكل شي-------بشوقي ولهفتي وحنيني
وديتك يا نبعي النقي-----وكنت شايلك في عيني
لاكن فيك خاب الرجاء-------وضاعن اشواق اسنيني
والعمر ضيعتا هباء--------وراك يالي ناسيني
أيجيك يوم---------تشتاقلي وتجيني
أيجيك يوم-------نادم اتريد حنيني
يالي بعد غاليتك------بدلتني بالغير
مايوم صفيت نيتك-----أحترت ويش اندير
--------وضاع ماكنت نا متمني---------------------------
-----وماخطرتش على بالك يوم تسأل عني---------------

من طرف **العاشق الصغير** 2012-08-02, 4:47 am

ماعرفتك كنك.......................اتزيد تباعد وين نقرب منك
((غامض كلامك))
ماعرفت هواك.............حيرت قلبى ياعزيز أمعاك
يوم ماتضرك عين يامحلاك..........ويوم ياعزيز يكون كافر جنك
ويوم بالكلام تجيبنى يالاك...........ويوم أتباعد كان هن صادنك
((ماعرفتك كنك))
امحيرنى .............كلامك ايقرب وانت تبعد عنى
ان كان ياعزيزالعيب في ومني.......اذكر سوايا يوم منى جنك
ناقش احكيلى وين عيبى كنى........حتى اظنون انريد نعرف ظنك
((ماعرفتك كنك))
عندى حيرة .....................معنى كلامك حرت فى تفسيره
ماعاد عرفته شك والا غيرة...........والا ظروفك قاسية لاينك
والا معاى اتريد فضة سيرة........وخايف احساسى تجرحه من حنك
((ماعرفتك كنك))
كبف اندير...........قول الصراحة ياحبيبى خير
مانمسكك بالغصب ليش تحير........انكان الوعود امعاى مامسكنك
ندعيلك ادعاء بالربح وين تسير.......اتعيش فى سعادة ياعزيز اجعنك
ماعرفتك كنك ........=........اتزيد اتباعد وين نقرب منك

((غامض كلامك))

من طرف **العاشق الصغير** 2012-08-02, 5:31 am

اسمى العاشق الموش معشوق* وأسمى رفيق الطلالى
أطلال وين مانجيهن أنروق *وعاشق أرياح القبالى
أرياح وين مايهبن أنضوق* أمعاهن اطعمت الغوالى
أوياريت فالنايبقئ صدوق* ويسر كل ماتمنالى
أنماروحو نلحق اللحوق* أنضاف النياء والبذالى
ألى الوقت فيهم أيسوق* عدا أورهدن أجمالى
ألى أخطورهم تما خزوق* أخزوق دوجهم كى تهايالى
وأسمى العاشق المزموق* ألى ماعشق فيه وألى
وأسمى العاشق المسروق* أبشى من طفولة أجيالى
وأسمى العاشق ألى عاش* أمحقوق والحق لى أوماينعطالى
وأسمى العاشق ألى دوم مسبوق* على من تمناه بالى
وأسمى العاشق ألى عمر مايفوق* مطموس من أوكال البسالى
وأسمى عاشقآ شى ما يتوق* أولا يوم فارق خيالى
وأسمى عاشقآ باب أمغلوق *أتربسينا باللقفالى
وأسمى عاشقآ مزن وبروق* مليت من صهيد الشعالى
وأسمى عاشقآ عاش فى شوق *محروم من أيام الدلالي

من طرف سلوان الجنه 2012-08-02, 5:35 am

سلمت على الأشعار الجميله والأجمل اخرها

يوم سعيد

من طرف **العاشق الصغير** 2012-08-02, 5:39 am

سلمك ومشكوره وبارك الله فيك
ويومك أسعد أنشاء الله

من طرف **العاشق الصغير** 2012-08-05, 5:48 am

قال الشاعر المبدع عبدالمولى زيدان

روحت مـ الدكتور فيدى صورة **القيت صورته فيها جميل الصورة

بين اضـــــــــــــــــــــــــــلوعى**القيت صورتــه هللى سبايب لوعى
وين شفتها غلبن علىْ ادموعى ** مخنوق عبـــــــرة دمعتى مجبورة
على كل ما نسعى فشل مشروعى**والقلب يا لاصحاب زاد سمورة
عاللّى رحل وما مشا فـي طوعى**هكى نصيبى خطــــوته مقصورة
وزاد صورته الغالي فِشَتْ ميضوعى** قدام الطـبيب منقشة محفورة
روحت م الدكتور فيدى صورة **القيت صورته فيها جميل الصورة
كتبلى وصفـــــــــــــــــــــــــــــة** ايريدنى نـــــــــبرا وجوّى يصفه
تــــــــاريتها كبدى بدت منقصفه**غازى عليـــــــــها همها مشطورة
تميت نـــــــاخد فى اوراقى نسفَه** والّنار فــيّا والعــــــــه مكبــورة
وشايل على صدرى مثيل الرّصفَة**هموم واجده للناس مش منظورة
كامى ابهن خواطرى منــــكسفَه **وصابرعلى ميل الزمان وجورة
روحت مـ الدكتور فيدى صورة **القيت صورته فيها جميل الصورة
مِشِيتْ امبــــــــــــــــــــــــــــكّر**الْ دكتور ثـــــانى بصورتى متنكّر
خذاها وبين ايـــــديه طول تعكّر**جوّه بعدما شفاها ف خطــــــورة
نظرلى ابْحن طال النظر ويفكّر**رفعلى يــــــــديه وقال في منشورة
مش عندى دواك اليوم فـيك انذكّر** أنت داك مش طبّه دوا وتنثورة
امشى ال شيخ يرقيلك علـــيه يسكّر**فازع قوى برهان طـبك شورة
طريلى كمــــا الزكّار وآن يزكّر ** فى فم جامع حــــايسات أمورة
روحت مـ الدكتور فيدى صورة **القيت صورته فيها جميل الصورة

ردت المتميزة بنت البدو وقالت

روحت مـ الدكتور فيدى صورة **القيت صورته فيها جميل الصورة

عند الطبيب انداوي**انعاني فمرض في داخلي متقاوي

جرحي صعيب ديمة سطيرة كاوي**نار شايطة فى كبدتى مكبورة

كل يوم في الزايد وماهو شاوي***تمكن فجوفي قاوي علي جوره

كابي علي وجهي ولاني هاوي**ولاني منلي بلحكي مشهوره

نكمي ونكمي والسطير فجاوي**خلاص ما نقدر ونا معدوره

بنقول انه في الغرام سطاوي**يبعد ويقرب في لاعماق جدوره

حبك تمكن في الجواجي طاوي**مكدس اكداس اكداس تاير تورة

استغرب طبيبي كيف ماني ماوي***علي قلب مشاضي كثير اسمورة

قتله طبيبي راغلايا حاوي**كل شبر فيا ليه نا مجبورة

مستعمر موتق والخلايا ناوي** يسري مع لعروق داير دوره

خلي المرض خليه فيا قاوي**نعيش بمرض لا نموت نا مقهوره

روحت مـ الدكتور فيدى صورة **القيت صورته فيها جميل الصورة

رد المتميز ذا عرج وقال

صوره حيه .....................داخل افكاري وجثتي المرميه
بلبسها ولوانها النقيه ..............داخل الخاطر واضحة محفوره
الدكتور حاول ما بخل عليا .......ونادى على الطبَه طلب الشوره
وين ما يصور تطلعلاَ هي .........قال ياجماعه لمر فيه خطوره
وقرر جراحه عاجله فوريه......وطلع سكاكينا فتح قجوره
وحسيت باليبره مشت في يديا....وعدى وخيك في المنام فشوره
بدى يشق في صدري عزق كميه....ودخل مناتيشه يدير فدوره
وتمَا يصيح ياعليك بليه .......وفاقد من الصدمة جميع شعوره
انا شفتها وبسبابها العمليه .....كانت مصيبه اطرافها منثوره
وتما يوسع في الجروح شويه .....لقى القلب مدور مثيل الكوره
ومكتوب مابينا وبين الريه ......امناي وحياتي نشوفها مسروره
روحت م الدكتور فيدى صوره........القيت صورته فيها جميل الصوره

رد الشاعر المتميز عبدالحميد السنوسي وقال

روحت م الدكتور........ وفى الراس صورة مولى العيون الحور

وفى القلب شايل هم بيه أندور

غلا يا رفيق أنموج وان أخطـــوره

غلا ضرنى خللاه ليلى أسمور

جت قصته يا صاحبى مبتوره

روحت شايل هم...... وفى اليد صوره اتكدرك وأتـــغم

والقلب ينزف من أعروقه دم

والعين بينى وبين ادموعها مشطوره

والروح تردم فى غلاها أتذم

فى اللى رخــاها نادمـه مقهــوره

وكللى على كللى مافى شى أتلم

ولى عين خللت قصتى مشهوره

ردت المتميزة طرفه وقالت

روحت مـ الدكتور فيدي صورة**القيت صورته فيها جميل الصورة

مشيتلــه إيداوينـي..إيداوي اجـــــــروح امهلعات كنيني..ماللي خطاهم فالغلا رازينـــــــــــي..انريد شورته دكتور باهي الشوره

قابلته ع ايساري التفت وايميني..الدوا دغري عجـــلي بحضوره

قتله طبيبي وبنــبــرة حزيني..عندي قلب،نيران فيه مسعورة

ماتستعجل بالدوا خليني..نحكيلك ع خاطري وكسورة

من غالي غاليته اسنيني..فجوفي اسماه احروفه محفورة

مابخلت عليه بود لابحنيني..وهو زاد بالغلا عيشني مسرورة

بداية غلانا حاضني حاويني..نساني هول الزمان وجوره

وهو بغدره فالخفا امراجيني..عقلي استاهة لخبط عليه اموره

وعيني اللي دمعها كاويــني..خطاه امعاي فساعة النوم اخطوره

وخاطري يجض بألحان حزيني..عايشة فالحياة مقهورة

ضاع الغلا ماعاد اللي يعنيني..تلاشى حلمهم بهجــورة

وقلبي اسكر ياطبيب يكفيني..وهذي حكاية جرحه اللي فالصوره

وإن اقدرت بالدوا داويني..!!والا استاصل هالقلب من اجــدوره..!!!!!!!!!

من طرف **العاشق الصغير** 2012-08-05, 5:52 am

واخذ الخلا خلونى **اوخاذ الخلا بالك ايحيد اغبونى ** مليت م الونس

واخذ الخلا اوحدى .... خلونى نبكى ع الغلا بجهدى

لاعد انكد ع العرب بنكدى .... لالا يجيب لقصى سيرتى والدونى

نا والعرب نقعد عليه اصردى .... بين ينفعوا ف الراى ويضرونى

الا يقولى دمعك بلاش يغدى .... ولى يقولى باهى ابكا دكنونى

والا يقولى ماعاد اهناك ابعدى .... بكاى غير لكن ماتقعد عونى

لوكان منقهر راهو طلع ع الجدى ناخذ.... اللى دار راى وقالى حنونى

الخلا بالكم يزيد اجلدى .... وان كان ع العمى بينى وبين اعيونى

واخذ خلا وانسيل .... مليت من خبر وااااجد يهد الحيل

لايجيبنى راى العرب ويشيل .... ولا عاد نتبع فيت ظن اظنونى

ان كان ياخلا تقبل على جميل .... نشكيلك عل اللى بالطلوق خذونى

لامفاصله فى الراى لاتدليل .... مبروك غير واتاهم ثمن باعونى

واخذ الخلا فى حالى .... غالى عليه روحى وعندى غالى

قولى الا انسينى وحط بدالى .... ونا عادتى ننسى اللى نسيونى

مافى الغلا ياعين تبقى عالى .... ولانى عليهم كيف ما يبونى

لاخير فى كلمه اتجى فى التالى .... ولا خير فى ناسا نظرهم دونى

ولا خير فى غالى امسيب غالى.... ولا يسير فى قولى غلا بالبونى

بينى وبينك مو معطب حالى .... الا اللى شكيت لهم وما سمعونى

غباوين لو ناخذ خلاى الخالى ... وعقدة ايدى انحلها بسنونى

من طرف علي صالح ابشيش 2012-08-05, 6:52 am

صاحب صوب هناي مشوي... يوم ودود ويوم عدوي

من طرف **العاشق الصغير** 2012-08-06, 4:37 pm

بالعيون حكينـــــــــــــــــــا،،

نظره بنظره بالعيون حكينا***وجبناخواطرواجده اشاكينا

ولافي باله**يوم الزفاف قدام باب الصاله

سبحانه بصدفه كيف جيت اقباله***وسبحان كيف عيني رقت في عينه

تمت العين بدمعها سياله***وهي زاد تبكي بالدموع حزينه

ياريتني ماريت ويش جراله***وياريت ماريناه لاغالينا

ولاريت ناسه معاه والعواله***ولاريت ضي ولانظرت الزينه

المهم بعيونه حكى باحواله***وحكى كيف فرقانا وكيف انسينا

لايم علي وماقدرت انساله***على حظ عاكسنا وجارعلينا

باني عليا من زمان اماله***ضيع معايا في رجاي سنينه

قلة المال وياس هدا ماله***وظروف واجده حايلات بيني وبينا

تما يعتذر وناقريت اقواله***وقال لي جفانا اليوم موبيدينا

سامحته وعدى كل حدفي حاله***كمل طريقه وبالنصيب ارضينا

من طرف **العاشق الصغير** 2012-08-06, 4:39 pm

يوم الزفـــــــــــــــــــــــــــــــه

يوم الزفه**لحظه غريبه خاطري صادفه

موكب كبير وبيه لفوا لفه***علي خطموا نسيوا مشاعر فينا

جابوه لاعندي وداروا صفه***قدام مرسيدس عليها زينه

عيني بكت سالت الله يلطفه***مشهد حزين وهي معاي حزينه

تمنيت روحي قبل مانعرفه***لاصوب درته ولا غلا غالينا ..

من طرف **حبة مسك** 2012-08-06, 4:51 pm

معليش دير حتى انت زفه وريهم وحقك علي سيارة مالاخر تزفك

من طرف **العاشق الصغير** 2012-08-06, 4:55 pm

مشكور وبارك الله فيك عارفك ماتقصر

من طرف **العاشق الصغير** 2012-08-06, 5:06 pm

يا عزيز انراجـــــــى

لاعند امتى يا عزيز انراجى ...مليت م الرجا ضايق اليوم ملاجى

ياعزيز امطول ...وانا انراجى للقاء نسول

صبرى نفدتميت مانى لول ...سديت وانا فيك غير انداجى

حتى ان كانى عايش انسان امهول... من ظيم الدهر ملحوق مانى ناجى

ما بيت ناخذ فيك قول اتقول ...مازلت رانى فى رجاك امراجى

ياعزيز غيابك ...وانا انراجى غير دابى دابك

مازلت رانى ما قفلت احسابك... ان كان نشغلك عجل بجيب علاجى

مليت م الرجا جور على عذابك... مخلى انظارى دمعهن قجاجى

ياعزيز مطرف ...وانا نراجى للقاء نشرف

امفيت بيك ماعندى بشئ انخرف... سريبك ابقى لى هم بيه نهاجى

الا العين منهمره امغير اتذرف... مابت عليك تكف باحتجاجى

ع اللقاء متموح ...وانا اناجى فى الاطلال انوح

حتى ان كانى حيطة رجاك امطوح... واظروف الزمان مطيحات ابراجى

لكن الغايب م الغياب ايروح... بحضوره يفرح فى رجا لمراجى

من طرف **العاشق الصغير** 2012-08-06, 5:13 pm

طاحت شمس ياغالي غلاك ------ و خيّم ليل من فرقاك شين
يوم سعيد يا مسعد مساك ------ و فرحة عمر تمت بعد حين
وياامحلاه ضحكك يا بهاك ------ عليك يخيل الابيض و الثمين
ادودش بث فالدنيااضياك ------ و فوح بعطر ورد الياسمين
ها يا داي يا حالي معاك ------ هذاوين ما صدّق البيان
ياللي كنت نفرح في زهاك------ كنّي اليوم في فرحك حزين
و كيف تكون هي ساعة هناك------ ساعة جرح في صدري مكين
و ايش اليوم قالن لك ارياك------ ووين القيت خاطيي قرين
واحد قبل راني و انت راك ------ كنّا كيف تمينا اثنين
و كيف ازعما تحكي عن هواك------ لغيري فيه ليل االنايمين
بنطق السان تهمس به شفاك------ واللا بضحك عين المستكين

من طرف **العاشق الصغير** 2012-08-06, 5:34 pm

يوم وداعك ياما درنا

قبل أنهرنا......

لولا سبحانه صبًرنا

يوم فراقك كان صعيب

ويوم رهيب......

أركبنى فيه أهموم وشيب

يوم وداعك يا الحبيب

النار كبرنا..............

فى جوجى هايف سمًرنا

مكاتيب وما فيه نصيب

وزاد قهرنا......

ياسك عالتوديع جبرنا

جرح وداعك شى غريب

وما شاورنا..........

ولا والى منًه حذًرنا

يوم وداعك...............

يوم وداعك ياما صار

نكد ومرار.........

ودمعى فوق الخد أ سطار

فراقك بكًى جار الجار

الياس غدرنا.....

فاجانا بفراق قهرنا

اليوم أديارك لى مزار

وكى خاطرنا...

يدردر شورك يجبرنا

العين أتقوده شور الدًار

إزور وكرنا.............

نشلوا فيه إحيد كدرنا

أوهامك تمت كى المزار

وان جضرنا......

نطلق فى الاوهام نظرنا

يوم فراقك ياما درنا

قبل انهرنا

لولا سبحانه صبًرنا

من طرف **العاشق الصغير** 2012-08-06, 5:36 pm

يا عون من غايبا جاه ... وطفَّا لهاليب نارا

نا غايبي طال مرجاه ...وابقيت غافر اديارا

زعما وين ساقنَّا ارياه .. هو حي والاَّ توارا

زعما وين ما جوَّر كداه ..في من ايشيِّع انظارا

عزيز عيبتا امقدِّر الله ...والله مي قلّة ادبارا

عزيز ويم ما اتطوف ذكراه ..نصفق ايدي بحرارا

شوي البكا فيه وافداه ....واشوي فيه قولت اخسارا

من طرف **العاشق الصغير** 2012-08-08, 6:40 pm

نهار دزته للكرت يعزم فينا *** متشمت غني والا يلوم علينا

الكرت اوصلني *** طعنة غدر يبيها غني تقتلني

يحساب روحه ان دزلي يشغلني *** ونا في الغلا واخذ على التقزينه

مامن غلا درته زمان ذبلني *** لتو في جوفي جروح دفينه

لا الهن دوا لا فاد من ساولني *** برن ع العدم تمت وخيذه شينه

درته جديد وف الغلا دللني *** واللي خذا قسمه ايواطي عينه

كروت جميله *** دز وعزمني في نهار رحيله

نهار زفته مول العيون كحيله *** اللي قبل من كاس الغلا ساقينا

عاتب علي واريدني نمشيله *** ناسي جميع ماكان بيني وبينه

هاذين القسامي ما معاهن حيله *** مكتوب ربي وبالنصيب ارضينا

بكرت عزمني *** ومن خوفه ننسى بهاتفه كلمني

متشمت غني والا زعم لايمني *** ونحنا مع دربه سنين مشينا

لظروف الزمان وظلمهن سلمني *** احدود الفزع بيهن ادموع بكينا

ابكا في الخفا من خوف حد يعلمني *** وتبقى شماته من اعدانا فينا

ياريته اتعب لي والسبب فهمني *** حكى لي وجت عيني اصدار لعينه

غيابي بلا رحمه بظلم حكمني *** يعيش في شقا عقلي عقاب سنينه

من طرف **العاشق الصغير** 2012-08-09, 3:32 am

مسّع يوم أطفى منشابه ... سود حجابه .. لا كتّاب نصيبى جابه

******

مسّع يوم أقدرت أنسيبه ... سود رغيبه .. لكن فى قصقاله غيبه
كنت اللّى عقلي شاقيبه ... مانحسابه .. يلفى ياس يسكّر بابه
كيف أنشوف منام إيجيبه ... مجلى نابه .. نلقى منظرتى كذابه
مابن جاي إيجن شابيبه ... دور سحابه .. سوّاقه غادي عدّابه
خبط أمناي ونحنا طيبه ... فى مهلابه .. جدّ أقناق أقوا ميزابه
مدعا صوب أخطي ترتيبه ... بوبحنابه .. نين اللّي أهناك حكابه
شوف اللّى قدّام سبيبه ... يدّاعى به .. سيده خيل القوم اتهابه
سرزه دق أسطى تخضيبه ... فوق أجنابه .. داير ضيّ إيتوق أركابه

******

مسّع يوم أطفى توليعه ... من تلذيعه .. جضّ الخاطر صاف ربيعه
نظره مافيها ترقيعه ... مانزهى به .. ضدّى تمّ اردود وجابا
صوبه عالوا فى تقطيعه ... جوا هندابه .. عللّى إينابيلى بصنابه
شوره ماعندي تقديعه ... فيه معابه .. تمّا مومضمون أحسابه
عقلى من بوعين وسيعه ... فات أغصابه .. من تاريخ أسنين شبابه
خذ لفكار مع توديعه ... راحن جابه .. خيل الياس لهن لغّابه

******

مسّع يوم غلاه نسيته ... عالى صيته ..لكن مقطوعة قسميته
قلّ وفاه امعاي القيته ... من دولابه .. ع الحبلين أقدع لعّابه
صوب اللّى تنهان أن جيته ... لاتشقى به .. يبقى سوق أقطاف عقابه
سآل أمجرّب عاش قضيته ... قاس عذابه .. قرب أمناه وطول أجدابه

*****

مسّع يوم جميل الباسه ... فى مجلاسه .. قالوا هايا عنى ناسه
عللّى قانونى من ياسه ... ضاع منابه .. نندب لونلقى ندّابه
خاين مول الدّور أمواسى ... غيري نابا .. قدّامى وأسمى ماجابه
ناير خدّه بين أقصاصه ... فى فم غابه .. ليقة نار خلا لهلابه

*****

مسّع يوم أمراره هاون ... داه أمكاون .. مابن لوعاته يدّاون
بوذرعان أسماح أضّاون ... هن وأكعابه .. تحت سلوق رقيق أثيابه
من فزعات خطا ماياون ... حيل أعيابه .. عقلى قول ألقيت أسبابه
كاميه وماجاه أمعاون ... شال أغلابه .. مابه باس الاّ غيّابه

*****

مسّع يوم علينا هان ... بطول زمان .. غلاه أمعانا كي ماكان
أنريدوا لبّاس الرّنان ... وهو بأحبابه .. كل أسبوع يزيد أعجابه
عاشق ناس إيبال وضان ... لهن كسّابه .. فى مرياض هميل أسهابه
وطن أمناة القود إيبان ... أظلم حلاّبه ..يضّابح دودان أشعابه
كان املاقا للفرقان ... أمنين اصلابه .. غرقن فى نوّار أرقابه

*****

مسّع يوم أقناق أخطوره ... حودد لاهان وهنّانى
قلّ إحسان جميل الصوره ... فيه وفى الافلاس انعانى
مالى ناياتى من شوره ... زاعب سيل أمواجع جانى
صاعن فى بعده واحضوره ... صوب اللّى جرّه ردّانى
ريدي من تشعيب آموره ... تمّن منقلبات أوزانى
ديما فى قولى مذكوره ... جبت أوصاف أقدم بلعانى
بينى نا وأمسفّى دوره ... عدّن كيف أيام زمانى
هن واصحاب أرقود أقبوره ... فرقاهم تنكيد اشقانى
كانوا هل شوف المبروره ... ملفا للطّرقى والدّانى
فى رقراق إيدير اديوره ... وأشقاراه أمهندل بانى
تحلف طيب نسيم أعطوره ... فى وصفه قال الدّهمانى
هل مصبا ولهم ف النّوره ... للجالي من بدر وثانى
منهم للقرعه مديوره ... بيت النزّال البرّانى
ف التمنيح وف المسفوره ... نالوا صيت عطا ربّانى
كسّابين أمدورم زوره ... لصفر بوذرعان امتانى
مامن فجّ ادّانن قوره ... له جوّابه .. وين الخالي دار ضبابه
عشبه من شآبيب أذكوره ... فوق أترابه .. طاهق كيف الزرع الصّابه
رق أتقول اجلود انموره ... فيه ادّابه .. صيد أرجود وهم ضرّابه
بوجرعود ابيض بحموره ... سمح الرّابه .. خلاّ شانى ناقص قابه
ضدّى سيّاته منظوره ... مهما غابا .. تمّ أمعاي إيزيد اعطابه
لولا تصعيده واحدوره ... دابى دابه .. نين أنموت ونا نشلابه
عدّا بوجمه مظفوره ... ياسكّابه .. من معزابه .. مال خذوه أعدا نهّابه

من العاشق الصغير إلي كل ألاعضاء والزوار

من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار