من العاشق الصغير إلي كل ألاعضاء والزوار

من طرف **العاشق الصغير** 2012-05-11, 4:49 pm

تذكير بمساهمة فاتح الموضوع :

تلاقيت نا وياه .......... ماشي وجنبه ماشيين ضناه
الغايـــب بعد مُده
امعاه عويله ............. قابل وكانت غايتي نمشيله
انسلم عليه ونعاتبه ونحكيله ........... ليش الغياب وليش طال جفاه
واذكرت كي ريته اسنين جميله ........... أياماً وهو فاضي ونا مشكاه
كنا انتلاقوا كل يوم وليله ........... وماضي توارى كنت فيه امعاه
وانقطعن أخباره وين شال رحيله .......... عليـّا تباعد كنت جار احذاه
ودورت واجد ما لقيت وسيله .......... ونحسابه الغالي ما يطول رجاه
واليوم قابل بوعيون كحيله .......... وما حس كي ماريت من يالاه
صفقت بيديا ونا نوميله ........... وانقول في سري الله الله
امعاه أصغاره .......... غض النظر واطى عليا أنظاره
عديت شوره ودمعتي منهاره .......... وتميت نمشي فالطريق وراه
تمتمت كلمه قلتله عِباره .......... وعاودت شَريط الزمان امعاه
حاولت نحكيله انجيب إشاره .......... وانجيب ذكرى اتذكره بغلاه
لكن تبينلي من عيونه اخساره .......... ناسي الماضي وكل ما قلناه
ولا جاب مني شئ في تذكاره .......... وحتى كلامي ما فهم معناه
مديت يدّي وقلتله ببصاره ......... كل شئ درته فالحياة تلقاه

مابت البال تفــارق

مابت البال تفــــــــــــــــــــــــارق...............صورة عزيز النوم مني سارق

حتى وهيه بعيـــــــــــــــــــــــــده...........تخطر فلانه كل صبح آكيـــــــــده

وتسبق اوقات النوم فمواعيــــده...........لين خاطري ماعد اقدر ينساهــــــا

مقهور من صغا ليام جاير كيـــــــــده...........هيه انغنت عدّت وهوه بلاهـــــــــا

ذايق امرارالوقت وتمرميــــــــــــــده..........وخطور طيفها وقلّة العين هناهـــــا

وماعاد عنده ف الحياه جديــــــــــــده..........عايش يعاود في قديم غلاهــــــــــــا

ضاقت عليه الواسعه من ريــــــــــده..........اللي الياس عن شبحه بعيد زواهــــا

حتى بعد غنواها............مابت تفارق خاطري ذكراها.............معاي سالمة

مابت البال تفــــــــــــــــــــــــــارق...............صورة عزيز النوم مني سارق

ومقلّل هناي وزاد كبدي حــــــــارق...............وملازم العين وجاي دون غطاها

حتى وهو غني عنّي بعيد وغــــارق...............فهموم واجده نفسى وراه خذاها

ما والفت لآخر اللي ما فـــــــــارق...............يماطل وما غيّر نهار اريــــــــاها

متمكّن غلا لــــــــــوّل امبيّن زارق...............ويظهر ولو مليّت غيوم سمــــاها

صحيح خلّت الخاطر شارق...............وغنيّت ولكن عاز من يسواهــــــا

حتى بعد غنواها............مابت تفارق خاطري ذكراها.............معاي أفلانه

تحيـــــــــــــــــــــــاتي
أخوكــــم
العاشــــــــ الصغير ــــــــــــــــــــــق

من طرف **العاشق الصغير** 2012-09-28, 5:59 pm

اليوم أوحدي
.

اليوم اوحدي
خانوا الغوالى من اطياح اسعدي
عايش بلاهم

اليوم ابروحي
... شايل عذابى او حيرتى وجروحي
زعـــــلان من حبان كانوا روحـي
تـمــــوا شقاء عمرى وكل انكدي

غابوا عني
هلى الغلا والــــــود نالوا مني
ندعــــى عليهم خاطرى متمني
ماخير يلقوا كــان حبوا ابعدي

من طرف **العاشق الصغير** 2012-09-28, 6:33 pm

هبا م الليل وجرنانا ,, جايب جانا ,, طيف اللي موحه كدانا

هابا م الليل ومطراه ,, يجيب معاه ,, سريب اللي طول مرجاه
منيدي خطم ياس خذاه ,, برم خلانا ,, ف اوهام الغياب حزانا
جيوشه حالن بين دناه ,, وفيه رزانا ,, طيفاً كان احدود منانا
انكمل ف الليل امهاياه ,, الدمع ملانا ,, ع الخد ايقجن غدرانا

هبا م الليل وتعذيبة ,, فيه الريبه ,, وفكار ورايات عطيبة
نجبد في موحه وسريبه ,, منّه دانا ,, وين اعلقنا فيه رخانا
جرحه ف الخاطر نشكيبه ,, ما هنانا ,, كي يدمى يا طول شقانا
ما نفعت فيه التطبيبه ,, لا كويانه ,, منا مقطوعات الوانا

هبا من جرنان الليل ,, بعد يلفى يا طول شقاي
نشعر ونهاجي ونشيل ,, الصوت علي تبوزيع غلاي
ايديرن فوق اخدودي سيل ,, ايقجن قلالات هناي
يخطر بو مشي اتزعبيل ,, ايجي يدودش من يالاي
جميل وفيه الوصف ايخيل ,, قمر كان امضوي دنياي
بو ميم اتقول قرابيل ,, ايضرن كان التفتن جاي
بو مضحك فيه اتشهليل ,, ان كان تبسم يبرا داي
سبب فرقاهم قال وقيل ,, سمع سهراية ناس اعداي
قالوا له فيّ مقاويل ,, تبعهم ما شاور ف الراي
رقد واصبح ناوي ع الشيل ,, حلف ما يقعد يوم احذاي
رحيله ساقوه معاجيل ,, الحقته عيط ياس وراي
جرحني بو ممشوط طويل ,, وخلاني غاطس ف ادماي
متشوكل فيه اتشلشيل ,, الجرح اصاعب ع الداواي
علي جرحه ما عندي حيل ,, انجض وهذا حد عزاي
الخاطر منّه راح دقيل ,, وزاد افراقة قل هناي
لنا ما دز مراسيل ,, ولا ينشد عنا ف الجاي
نصبر كان الصبر جميل ,, بعد لخوانا ,, من ناساً كانوا مشكانا
هبا م الليل وجرنانا ,, جايب جانا ,, طيف اللي موحه كدانا

من طرف **العاشق الصغير** 2012-09-30, 9:55 pm

مـالـحــيــاة مـيــســا *** أحلام خاطري فيهـا اليـاس طمسـا أعــــــروق الـمـحــنــة

أنـــدور فـــي ديـمـومــه *** تميت من رهادين الزمـان وشومـه
أمغير مارضيت أنكون دونـي قومـه*** عصـران نفسـي عالـردا حابسـه
وان رومت نفسك للعفـاف أترومـه *** وعند العرب عـز الفـرس فارسـه
أصحى مسالكن فى الناس مي مفهومه *** تحلف طلاسـم مـن فقـي طلمسـاه
لكـن غريـق الجـال دوم أعلومـه *** مو كـل مـن طالـع أكتـاب درسـه
صحـيـح حقـيـقـة طـول الجفـا *** ينهـي العقـل أيعيقـا ومشارك مع ظلـم الزمـان وضيقـه
تذكار صوب في قلبي أهموم غرسـا *** لـي قبـل لاقابـل أمسفـي ريـقـه
ننسا العرب ونـوض مـن مجلسـا *** ويمرن أيـام العمـر كـي الدقيقـه
ما بيـن بسمتهـا وطيـب نفسهـا *** ماعـاد مصباهـا أمعـاي أنطيـقـه
قطور سم ينـزل عالفـواد أنحسـا *** وان كان قابلت ترقى أمعاي حريقـه
أنغيـر طريقـي خطوتـي نعكسهـا *** درست الحيـاة حللـت كـم طريقـه
ألقيت سرها غايـب علـي دارسهـا *** وبيـن المناهـج غايبـة الحقيـقـه
كثيـر مايغربنـا لصـيـف دنـسـا ***وسبحان من أمغير كـل حـي بليقـه
جديـدة علـيـه ولـولـه ينكـسـا ***الخاطر أبقي شـوم الحيـاة رفيقـة على ساحلا بـرم نصيـب أورسـه

أكـــثـــر تـحـسـيــبــة *** الخاطر وشايب قبـل موعـد شيبـه
ولي قبـل ماساعـة زهـاه أيسيبـة *** اليوم فرحتـا ظلـم الزمـان علسـه
ولبنـادم مثيـل العـود لـه توكيبـة *** لخضورتا أيجـن سكـرات وتيابسـه
ومريـت بتجـارب فالحيـاة رهيبـة *** وماحد أيحـس النـار كـي عافسه
ولو نصيد مانبرم الهـم فـي صيبـة *** كاره النـاس ومـا نطيـق ونسهـه
خليهـم لفاعـي فـي نهـار الغيبـة *** دبيـب سـام لكـن بالهـدوم تكسـه
وصاحب المصالح في ألباس أنطيبـة *** قليل الكرامـة لـك أيواطـي حسـه
بخدمت الكـذب ورضوتـا العطيبـة *** خدمهـا وطاعتـلا بعـد مارسـه
أيديرك أهلالي لك أوصـاف عجيبـة *** وجرت أكراعـك عالوطـا يلحسه
ويرضى علي شانـك أيبيـع رفيقـة *** نذيـل المبـادي عالوطـا دايـسـه
شاقي مـع وضعـي وفـي تنسيبـة *** موالـف أطبـاع اعرابـي اموانسـه
والمكـروه نكـره سيرتـا ونعيبـة *** ولي الرزق منهم بيـن ديـه أيقصـه
وخليك من علل مول العيون رغيبـة *** أمشـارك مـع ليـام واخـذ حصـه
والعين من رهاديـن الزمـان تعيبـة *** حايسـة بـلاه وزادهـا حووسـه
لها زمان ما مجرى طـرب تمشيبـة *** سفينة الزهـا عنـدي نكـد را يسه
لانـرتــجــي رافــتــهــا *** ولاني أمراجي خيـر مـن جيهته
الدنيا مطيـرة علـت فـي حرثتهـا *** وجاد الولي بدري أشبـوب كبسه
اومير الشتـاء عـادات لـه ثابتهـا *** وكيف ما فعل فيهـا فعـل مارسه
اوزود عالزراعـة واخـذا صابتها *** ولي يجيك في عينـك أيكيـدك دسه
والعين من قديم الوقت هـي عادتهـا ***علـي ماتـذري عونهـا عاكسـه
ونقيتهـا مـن كـل شـي جـرتـا *** وليالي أسمـور قضيتهـن حارسه
جنـا أبـداع الله فــي نضرتـهـا *** وهي تموج لاهـادي نسـوم ألمسـه
وروس الحسك تحلف أمـواج علتـا *** سوا في ضحـا ولا أبواقـي المسـا
ويـن مانويـت أنعـول فـي لمتـا *** واتـي لـي يحصـد ومـن يدرسـا
الياس أنزعج جاهـا علـي طيبتهـا *** حصد ما حرثـت ومالوجـود كنسـا
ومنحوسـا وماتبـح لـي أرفعتهـا *** ومعاهـا العيـن وعينهـا منحسهـا
ومنتوجها حسايف بالبـلاش خذتهـا *** ونقـل غيـر صبـارا ألا متعسهـا

من طرف **العاشق الصغير** 2012-09-30, 9:57 pm

تـْقـُول ف الغـْطا مكتـُوب ، يخـْطر عزيز ساعات نومْها

*****

يخـْـطـــــــــــــــــر زولـَـــــــــــــــــه

مَولــى الحـْداجــــه لاورَا مَجـْـــــدوله

من طـُول مَوحـْهم تمّت تـْموج مَلـُولـَه

والعيـــن في زمان المـوح ، تمّـــا حْساب عاميـــن يومْها

*****

لـْهــــــــــــــا يصّــــــــــــــــــــــــوّر

نظيـــف العَضا مولى الجـّـبين مـْدوّر

نـــاره زرَت عَ العَـقـــل نين تعــــوّر

والنـّار يا عزيـــز عَــذاب ، ان جــــارت الله لا يـْــدُومها

*****

يْهــــــــــــــــــــــفّ عليْهـــــــــــــــا

مولى الحـْـداجـــــه لاورا ســـافيهــا

لا تـْـــذوق قـُــــوت وْلا النـّوم يْجيها

واللـّي م الغـــلا مَـلـْيوع ، العَين عَ البْـكا ما يْــــلومهــــــا

*****

لـْهـــــــــــــــــا يـْـتهـــايـــــــــــــــــا

نظيــــف الخواصر بُــو ثمــان وقايا

صاف خاطــــري صَيفة ربيـع لوايا

والنـّار كي صهيـــد القـَيض، يْصيــف من يْداني سْمُومها

*****

ساعْـــــــــــة التـّــــرقيــــــــــــــــده

يخـْطــــــر عَليّ مْـنــــاي ومْواعيده

وقـَولـــة النـّـــاوي ساعْـــة التـّسقيده

العقـــل كـَي تـْغيـــب يْغـيب ، والعَين زاد يَشـْــوى نـَومْها

من طرف **العاشق الصغير** 2012-09-30, 9:58 pm

وين ما اليل ايليل...ايسيل دمعها وتحوس كيف العيل وايضيق علمها..
ساعة التظليمة..........................يخطر على افراق زول حويمه
ويبقن ادموعى يا رفاقة حيمه....اوهو العزم من غادى عطيب اقليل
اتضيق علامى...........................حوشت الظلام ونا طليس ظلامى
يخطر سعتا مجلسه قدامى.........اعيون من ترافق فيه لقح اوحيل
انوض بالغطا وانقول رد ايامى...من يوما نصيبى فى عزيز اتخيل
العقل ينصب نوعه.....................اينكد على او غايته ممنوعه
انردا ايفكن من ايدى اصروعه....انحايل عليه او ما عليه اتخيل
وان ارقادى.............................حوشت الليل اوجيتى لوسادى
يخطر عليا مجلسى واقعادى.....مع بو جبين ان تاق كى لهليل
اللى اليوم فى وادى ونا فى وادى..تركلى ظلام اودمع فيه انهيل
ويم ما الشمس اتغرب................يغرب المغرب والظلام ايقرب
جميع ما ضحكته فى النهار انخرب...انردا ابدمعا على الوساد اتسيل
على من تركلى بيت سمح امكرب....للياس والجضار اوحدى لى امقيل
وين ما الناس اترقد..................يخطر سريب طويل به نسقد
انجازى انريد انخلصا ايتعقد.....نلقاه حمل ثقل ما يشيل
شخص كيف حالاتى عليه اتنقد..الناس كان قاللهم انهو اخويل
اتضيق اخلوقى.......................ايحوشن على افكار ننصب سوقى
على من امحاى فى الصفاء اعروقى..اللى كان لقدارى وفاء امكيل
وقطعت قساميه او هو فى شوقى.....ما زلت فيها يا عرب متويل

من طرف **العاشق الصغير** 2012-09-30, 9:59 pm

عطينى سلف عينك اونبكى بيها ... عندى عين جفّ الدمع من ماقيها
عينى جفّت .. دوم سايله لا قوننت لا كفّت
ولا عمر بقدوم الغوالى رفّــــــت
نشارف نشيّع فوق ونواطيهــــــا
مليانه عصر ما يوم قالوا خفّـــــت
ولا هى الناشده على اللى ناسيها
مشت فوق جمر النار نين تحفـت
او بكت نين الدمعة نشفت ما فيهــا
عطينى سلف عينك ودير جميل
حمّل عليــه وللحمول انشيــــل
قول خاطرى ما شى مستحيـل
الا كون عينى ترجع الماضيهــــا
جميلة وما تلحظ الا الجميـــــــل
وميط ما لخلايق كان مايعنيهــــا
سلفنى سلف عينك او دمع ايسيل
او نا لا نسكتها ولا نطريها
اتذرّف على ما صار صبح وليــــل
مليان خاطرى بهموم غالب فيها
اتريد ابكاها .. ابكاء عجوز قطعوا خوتها وضناها
وين ما بكت بكّت اللى يالاهــــا
على هول واجد قبل ساير فيهـا
اوديمه تذرف ضايقات اوعـــــاهـا
بسيل دمع يملىء لرض باللى فيها
اتشيل صوتها يشقى اللى ينهاها
أتفرّج على.. يا صاحبى خليهــــــــا
اتكون عين قويّه .. بكايا وتذرف فالدموع صخيّه
عندى عين بخلت بالدموع عليــــه
نزح دمعها ما عاد بلّه فيها
اسنين واجده بكيتها الدعيّه
وكان دمعها حتى الوطاء يرويها
واليوم ريتها فى بكيها مرخيّـــة
لو لقيت بكايا لها اشريهــــــــا
اتكون سريعة فالدمع وين نامرها تكون مطيعة
لا نريد تصقيره ولا تلكيعه
ادموع حارّه لهذوب تنزل بيها
مظلوم خاطرى فى شرع كل شريعة
وما يحس بالجمرة الا واطيها
واللى تخدمه واجب عليك اطيّعه
والبيع خير من رهنت اللى تبيهـا

من طرف **العاشق الصغير** 2012-09-30, 10:01 pm

عشت وضقت امرار إخطــوره .... دار إنحوره دمعى زاعب ليلة جــوره

عشت وضقت امرار إخـــــلاف .... أسباب تلاف الخاطر والدمعـــــــــــه ذراف
ضهدنى فرقاهـــــــــــم لــولاف .... غسير إخضوره لامش خف عليه اشمــوره
إللى طاهق فى الغمداوهــــاف .... وقبل إنثوره صادف قيض اربا محتـــــــوره
بصرهادى واريـــاح جفــــــاف .... إقلع بجذوره ساقه سوق ضباب العـــــــوره

عشت وضقت امرار إخطــوره .... دار إنحوره دمعى زاعب ليلة جــــــــــــوره

عشت وضقت امرار افـراقـــه .... من مشتاقه به عينى ماصـار ملاقـــــــــــــه
شالت طول الليل غراقــــــــــه .... نجم ظهوره غايب من زاعـب تبـــــــــــروره
جملة ماقدامـــه ساقـــــــــــــه .... سيل طفوره عذوه فوق معالـى قـــــــــوره

عشت وضقت امرار إخطــوره .... دار إنحوره دمعى زاعب ليلة جــــــــــــوره

عشت وضقت امرار غيـــــاب .... على صعاب مواهيمه والمرجـا خـــــــــــاب
ادفر جادونه دج ســـــــــــراب .... اعلا مغموره به والواطى موج ابحــــــوره
اوكم وادى سوته واشعـــــاب .... علينا بوره دون اللى مشتاق انظــــــــــوره
كى ننوى ممشاه انهــــــــــاب .... على أوعوره يظنى فى رقــوه واحــــدوره
امفيت على فاطر يصهــــــاب .... ازكى بحموره يطنى هداجـــــــــات قـدوره
اجنش فى رطزه كى الحجـاب .... إعلى ناطوره والذروه كيف الكــــــــــادوره

عشت وضقت امرار إخطــوره .... دار إنحوره دمعى زاعب ليلة جــــــــــــوره

عشت وضقت امراراجـروحه .... غيب إنضوحه يظهر عالضماد اطفوحــــــه
من هذاك اليوم كلوحـــــــــــه .... ضاوى شوره غيرى عندى فيه اسمـــــوره
فى اللون ومده وســـــــروحه .... دار إقروره من غير النار المكبــــــــــــوره
تسرب فى المكنون جمـوحــه .... هدت صوره تدقل فيه عـــدم صيـــــــــــوره
مشكاه لمن بيده روحـــــــــــه .... ماى مثبوره تجعل يامـولاى صبـــــــــــوره
عينى تطلب فيه سموحــــــــه .... وآن إفجوره تدعى والتوبـه ميســـــــــوره

عشت وضقت امرار إخطــوره .... دار إنحوره دمعى زاعب ليلة جـــــــــــــوره

عشت وضقت امرار اتشـوق .... وين إنبوق عزم النار على اطـــــــــــــــوق
كل الوان الضيم اتــــــــــذوق .... دارت دوره مافاتت فى الجوف اشبــــــوره
تحــلف فيه الاتســــــــــــــوق .... غير نكوره هى نين اركانه مصهـــــــــوره
منهــا مــابـــــــــــات ولاروق .... مى محجوره واخرى مجحـوده مكمـــــوره

عشت وضقت امرار إخطــوره .... دار إنحوره دمعى زاعب ليلة جـــــــــــــوره

عشت وضقت امراراوهامـه .... رق عزامه عقلى تلفالـــه دوامـــــــــــــــه
من مارات إشهر قدامــــــــه .... بنى إقصوره تعمـــر لاكنى مهجــــــــــوره
فى البين والخافى يامــــــــه .... من مسطوره ذكره فى ذهنــى منقــوره
خــط ومتفــنن رســــــــــامـه .... فوق إصخوره موغابيــه امرور دهــــوره
فاهـر كيف اخطور ايـــــامـه .... غير الصوره تحظر تكساها شــــــــــــبوره
وتسكب عينى منضــــــــامـه .... قبل إحضوره تهطل هذالـه محـــــــــــروره
تحلف غيم إعلى قمقـــــامـه .... دفع إديوره يطفـر جالاته محفـــــــــــــــوره
ياواسع رزقــه وارحـــــامـه .... خالق حوره لولى مكنــون ومقصــــــــوره
ياغاطش نصــه بعتـــامــــــه .... كامل نوره مبدع فى تصريف امـــــــــــوره
ياعالم ذنبى وآثــــــــــــــامـه .... يوم إنشوره ترحمنـا وتجى مستـــــــــــوره
عند الجمع اوتوب قيـامـــــه .... بعث إقبوره يوما فيه نقر ناقـــــــــــــــــوره

عشت وضقت امرار إخطــوره .... دار إنحوره دمعى زاعب ليلة جـــــــــــــوره

عشت وضقت امراراغيابـه ....... واغيابه يـاعينى طـــــــــــــــــــــــــــــــــول
وانتى تميتى سكــابـــــــــــه ....... ماعندك شى فيـه اتقـــــــــــــــــــــــــول
دمعك م الماقى يزابــــــــــه ....... وين عليك الليـل إيــــــــــــــــــــــــــــــــدول
غيم امظلم طق احجابـــــــه ....... برقه فى الجالات إيعـــــــــــــــــــــــــــــــول
سيف إجبدفى يوم أحرابـــه ....... من فارس فى جيش إمـــــــــــــــــــــــــرول
كلتم تكبير وجابـــــــــــــــــه ....... ما بالفال الشين إيفـــــــــــــــــــــــــــــــــول
لمس إيدين تريس طرابــــه ....... حتى فلفدار إيصــــــــــــــــــــــــــــــــــــــول
لون الدم مع لتهــابـــــــــــه ....... حنا فى لاكعاب إطـــــــــــــــــــــــــــــــــــول
متلحقها شى نشهـــابــــــــه ....... ندوت غيم علرضــــــــــــــــــــــــــــــه زول
ريحا قدامــــه لعابـــــــــــــه ....... تبرم وتلاقيه إتجـــــــــــــــــــــــــــــــــــــول
بتزعزيع ارضـه ثـوابـــــــه ....... هدت كم قارح متغـــــــــــــــــــــــــــــــــــول
دون الغرا والدردابـــــــــــه ....... وام الهدار المتخـــــــــــــــــــــــــــــــــــــول
كسبت ناس اصحاب نقابـــه ....... واللى موش خماس عــــــــــــــــــــــــلول
بشاره لجفاف اشعــابــــــــه ....... والوطن اللى كان امـــــــــــــــــــــــــــــــول
حن الله وزال اجـدابـــــــــــه ....... للبارى ماضاع اتســـــــــــــــــــــــــــــــــول
قل جنهم خيرات وصـابــــــه ....... حتى اللى مونايل نـــــــــــــــــــــــــــــــــــول
شى زكاه وشى اطـلابــــــــه ....... حتى اللى جالى متهـــــــــــــــــــــــــــــول
طاله حن وزال عـذابــــــــــه ....... من فقر لنبساط تحــــــــــــــــــــــــــــــــــول
كلى نا ماشى قضــابــــــــــه *** عقلى فوره *** هذل الدمع ولااجهمـوره
من منشاب نظيف اكعابـــــه *** طفا كـــوره *** ينفخ ون واريت سعـوره
حسيت النار اللهلابــــــــــــه *** مابحكــوره *** تاكل لى عنــى منبــــوره
ملى له تذبيل رغـابــــــــــــه *** سود غيوره*** دا قتال اشقى دكتــــــوره

عشت وضقت امرار إخطــوره .... دار إنحوره دمعى زاعب ليلة جـــــــــــوره

من طرف **العاشق الصغير** 2012-09-30, 10:03 pm

يقول الشاعر عمران بوسيف

خايف عليكن منها ... مايصير فيكن خير كيف تجنها ... دار القدم

رد الشاعر سيد السبيب

خايف عليكن منها ... مايصير فيكن خير كيف تجنها ... دارا لقدم

عليه تردن ... يسيل ماقيكن والدموع إيجدن
خوذن كلامي باب صوبه سدن ... باع صوبنا زاد غيتي دافنها
أنسن سريبه يا نضاري ردن ... أجفن طريقه وسيرته خلنها
واليوم بطول الخطاوي مدن ... وما عاد داره تخطرن تمشنها

خايف عليكن منها ... مايصير فيكن خير كيف تجنها ... دارا لقدم

ننزل داره ... يهف ماضيكن وتقوي ناره
عين المجدى فى اطراف قراره... تمن خوالي ديارهم خطينها
بعد ما غلاهم في شاطت ناره ... غيدون صوبنا بالهجر زاد رخنها
ونامانريد نجبد غيته وتذكاره ... يبقي سريب وقصته خلنها

خايف عليكن منها ... مايصير فيكن خير كيف تجنها ... دارا لقدم

عليها إن جيتن ... يضيقن أعلامي تذكرن ماضيكن
بعد ماكان في الزهاء مخليكن ... قطمر أعزامي كبدتي ساحنها
وداير جديد اليوم متناسكين ... فارحبه ونا دموعي قاجات مزنها
ونا نقول داره تو ما تعنيكن ... خايف عليكن تذكرن وتجنها

خايف عليكن منها ... مايصير فيكن خير كيف تجنها ... دارا لقدم

اترق أغراضي ... وين ما تجنها مكانه فاضي
سريب منقطع من زمان وماضي ... مسوتهات ديمة ديارهم تلقنها
تمن جروحي طبهن متشاظي ... تصعب علي الطباب نانضمنها
نبكي عليهم ونا موراضي ... وبكيت الغاوي في الغلا مشينها

خايف عليكن منها ... مايصير فيكن خير كيف تجنها ... دارا لقدم

من طرف **العاشق الصغير** 2012-09-30, 10:04 pm

يم العيون السود
جيل ف النسا يفنى وجيل يعود
وأنت خيارهن

يم النياب رهايف
ويم المشط عالضمير ستايف
تمالك بما نلت بها لوصايف
بغير رادة خاطري مشدود
ومن ساعة فراقي لك العقل يرايف
يرقن عزومه لك يرد ردود
وخايف الياس يجي بجيشه زايف
يكسح غلاك ايصيف في الغمود
ويمشي الشوق من ضيم القسامي خايف
سحاب في خريف ارياح فيه تقود
ويمشن ثمانمية معاك غير حسايف
م الياس وعكاس الوقت والميجود
يم العيون السود

ظلني ارياي
وجيت يوم انجول
وطيت في حماك وثابي بارود
وطحت بين ديك ونا عدو منعول
طيحة فدائي بين دين يهود
تسجل قضيتي جرم من مجهول
خايف وما نلقى عليك اشهود
يم العيون السود

صياد من قديم الصيد به ممحون
ما ارضيت في عمري عطيب صيود
ولا سراب ما يروي عطش من دون
نداعي عليه وف العقاب نعود
ولا عمر صاحب ف الغياب نخون
ولا ورثوني هالطباع اجدود

يم العيون السود
جيل ف النسا يفنى وجيل يعود
وأنت خيارهن

من طرف **العاشق الصغير** 2012-09-30, 10:58 pm

مشغول عالقدم ياعقل ** امغير قول ما انقولها الحد

عود عوج يالقديم ** عنقالة الغلا ماتحزمك

يادمع واجد غير **لوكان في من يستاهلك

حتى اوهو عطيب اجهدي ** مازلت عالغلا ماننقدع

مني سرقت حيل العمر ** بالدنو ياغني سايستني

غنواك قالي مو عذر ** قديم جا متعامي علي

انجيبك ابشيل انظري ** واتريد تنتسى يا لولاي

ازعما كي انجول عليه ** نلقاه لولاي هو لولي

عزيز جاي في ممشاك ** مكبر كواينك يا امكونة

اوما فرزت غير عزيز ** كثرن اوجوه ساولتي علي

القايل القي ما ايقول ** ابروحي تراخيت عالغلا

اومامن غلا عنتيه ** والعمر يالنقابه هلب

مرات عالوهام انحوس ** اومرة انقول مالي اومالها

خطيتا الها واندمت ** للعين دار فالصوب راكحة

خبطت ياعزاز الموح ** والدمع غير كامي واجدن

اوما رادهن شي كبر ** لصوب كي بدري ايشارفن

لنظار في اسواق الصوب ** بدري دايشن ماضننن

امحوس شين في لوهام ** دارت العين مي امراجية

لعزاز مالقيت عذار ** نمشيبهن الهم نين ننستر

بلسمت ياغني عالناس ** داروك وانت ظالم منظلم

اتحيد في اغبون العقل** بكيت الدار راها امجربة

حكيت فالفواه اعلقت ** اوكي سكتت مرمدتني الوسوسة

داوايها عليها موح ** عديمة الغلا يانويرتي

اعيوني امعا لولاف ** تلاقن بكينا امناضرا

عزيز لو دناه ايسير** ماعاد العين تبكي ابغيضها

ادموعي عزيز طروه ** واترابي رقيق اساقطن

كان غير ما ادموعي سيل** غلا الدار عشرة زايدة

حسوفة اتهد العمر ** حذوني غنايا اونا غني

تمالي الياس شريك ** يقسم امعاي فالاي انجيبها

لدار في هاذيك الدار ** كالاي اوجوه ماهن الها

لوكان ماهشمني عمر** غيات ولاقدم مالن علي

ياقديم ناوياك ** متراوكين ويش ايحزها

جديد ما اندير جديد ** لوكان غير نبرى مالاقدم

عليك درت خوجة عزم ** هفيت ياقديم اربيتا

دناك ياعزيز ايحوم ** كالاي غلاك فيدي امصوقرة

بكيت ماعلي اشفقو ** اوكي سكتت عدوها علي

اولا العمر يبقى عمر ** اولا ابدمع خلوك الاقدم

انجي انطيح بين ايديك ** نين ناخذ سموحي مالغني

خاطي قديم نا والعين ** مالقينا مشاكي ينحكن

بلي جيتا لصوب ** خلااها علي مي لولة

النسو وين يالولاف ** وجناح لمواهيم لمنا

امغير شيلني للدار** واطلق اتقول بيني اوبينها

النار لوله ياعين ** مازال في اطرافي لذعها

بالعين نزلهم لولاف** هدو العقل هد اهدودهم

يالعين ماودوك ** للحومة خذوك اونازحة

غلا قديم نطري فيه ** انريد ثلث ماليل ناخذة

غلبان من اغياب عزيز ** لوكلن بالرجا ما اتهون

تبيعة غلا القديم ** مابت امعا العين تنقطع

تناصح القسم اوجاب ** لنا جديد نسا لولي

ايديه عاقبات وراه **جاكم العقل والراي عندكم

من طرف **العاشق الصغير** 2012-09-30, 11:04 pm

لا مسج دار ولا رن حتي رنه .......الكل يتصل لكن الغالي كنه
يا هل ترى زعلان ..........مني والا من ظروف زمان
والا انسي حبي وحبه هان ........والله القي غيري معاه تهنى
ومازلت نا مدمن عليه ادمان ..... كاس الحنان لي سقاني منه
وحتي لو انسيني والمحبة خان ... مازلت ننشد ونتعدر عنه
ونقول يمكن حايطين به خيان ...يريدوه ينسى من غرامه لنا
ونقول نا يمكن لهم ما لان .....ونقول يمكن لان غصبن عنه
ونقول يمكن مازال لي مكان ...في وسط قلبه وقطعه منه
حيرني غيابه بين كان وكان ....واه من بعده وقربه جنه
كحيل انظــــــــــــــــــــــاره ....ان كني علي باله يدير دباره
يستعين بصديق او يتصل من جاره..ان رصيده تام كامل منه
ذوقني غلاه وقست لوعة ناره...وعني تباعد والظروف خذنه
وتميت نا عايش علي تذكاره ...معيشة العابي والايام رخنه

من طرف **العاشق الصغير** 2012-09-30, 11:06 pm

( أنــــــتي )

أنتي همس ديمه فوق راس الساني *** منين تخطري انغيب على الوجود

انتي طيف طول الليل مايخطاني *** سهران بايت ولعباد ارقود

انتي شعر مايكملش من وجداني *** انتي قافيه ديمه عليا تجود

انتي نغم ريشه جايه فالحاني *** كتبتك على النوته عزفت العود

انتي حب ماننساك طول زماني *** لين ننتهي يحطوا عليا لحود

انتي ورد فله جايا فجناني *** الله يحفظك من كل عين حسود

انتي قصيدة غزل في ديواني *** معاها هديت العاشقين اورود

انتي قدر من ربي وبيك بلاني *** سلمت امري لخالقي المعبود

انتي روح ديمه عايشه فكياني *** مادامني في هالحياه موجود

انتي نبض ونتي دم في شرياني *** فالقلب مابين الحشا مرصود

انتي جرح ينزف دم فيه انعاني *** بالسيف كامي فخاطري مجحود

انتي شي مكتوبي قداك رماني *** في خاطري عايش على لوعود

النوم ياجميله من زمان جفاني *** مغير دمعتي تسكب على لخدود

حتى صبرت الصبر مانساني *** مع خالقي لا جهد لامجهود

من طرف **العاشق الصغير** 2012-09-30, 11:50 pm

حطيت وحلفت وخنت يمناك فوق يمناي ياغني

من طرف **جمال المروج** 2012-09-30, 11:52 pm

انتي روح ديمه عايشه فكياني *** مادامني في هالحياه موجود

من طرف **العاشق الصغير** 2012-09-30, 11:54 pm

وأخطورك أنداوي بيه وماقدرت ننساك ياغني

من العاشق الصغير إلي كل ألاعضاء والزوار - صفحة 7 497324

من طرف **العاشق الصغير** 2012-10-01, 12:09 am

ايخايل ديمه ..
فالخاطر اموكر مرتعه العزيمه
سريب لولي .
ديمه اوقات الطربه ... ايخايل علي بوقه وندردربه
تنداق بالجلاوي الاربعه تمطربه
نهار الخطا خلى العين يتيمه .
جواد الغلا كانت الا تحدربه
ما عمرها ذاقت امرار هزيمه .
ميط مالخلايق دنوهم تفخربه
اسماح المجالس هل انفوس كريمه .
وهناك مالخلايق كي عقاب الضربه
لا اترد عيب ولا تجيب غنيمه .
نلقانها رفيقتا الجربه جربه
وطبع البنادم ماتغير سيمه .
خطرها اللي لقيت اسبل عالخربه
روّادها امنزّل في اديار وخيمه .
كبرت نارها فالعقل نين استربه
وتما ايرمم في ميوح قديمه .
وما يجرحك بالغمد راس الحربه
سواد هدبها يقتل وهو في ميمه .
ايخايل ديمه ..
فالخاطر اموكر مرتعه العزيمه
سريب لولي

من طرف **جمال المروج** 2012-10-01, 12:11 am

واللـّي م الغـــلا مَـلـْيوع ، العَين عَ البْـكا ما يْــــلومهــــــا

الله يحفظك من العين والحسد
يعطيك الله العافية والصحة وطول العمر

قدها

من طرف **العاشق الصغير** 2012-10-01, 12:14 am

مشكور ياحاج
منيش وعليش وليش وبكاي عارفه حيل العرب

من العاشق الصغير إلي كل ألاعضاء والزوار - صفحة 7 82845955

من طرف **جمال المروج** 2012-10-01, 12:20 am

استبطيت استرخيت اخطاي*تهيا زول عزيز وراي

خوذلك ياالعاشق

من طرف **العاشق الصغير** 2012-10-01, 12:23 am

تهايولها وقفزت تحسابهم الا جو صادقه
اندور فيك لي زمان يحاج

من طرف **العاشق الصغير** 2012-10-02, 11:48 am

العين باكيه و دارت عليه عزا ..... الغالي تباعد والنصيب مشا

دارت ضجة ..... سالت سواقى من البكاء منقجه

احتارت اف ما بين الفراق ووجه ..... لفاها ابياسه ما اسعش هدا

دنيا قسامى كلها مرتجة ..... والبخت هالب والنصيب جفا

مكتوب يا ناوى الحج اتحجه ..... لا القسم عندى لا نوى لا جا

دارت همه ..... وراء بنت زينه فى الخلايق قمة

اللي وين ما رتها تقاوي سمه ..... سقاها ابصوبه ما ألقيتش نجا

أسماح الوصايف كلها ملتمه ..... سود الميامى والجديل ورا

واليوم بختي فيه طاوي كمه ..... مي رادتي نصبر على مدعاه

بكت بالقوة ..... اللي أفراق غاليها خذيتو سوه

انجرحت ونزفت والكنين تلوى ..... والشيب رتا فى السواد طغا

مكسور رانى غالبتنى الدوه ..... لا فادنى الدكتور لا الدوا

والقلب ينبض بى حروفه هو ..... والعقل عنده والافكار خذا

دارت جره ..... سيول وتقاوت بين ياس ومره

جفلت وحاست من البكا منضره ..... غالى عليها فى الوساد لفا

سمرت عقاب الليل ليله غره ..... أتقول ما عمره عليها جا

كمدت بحرقه ريدها فى سره ..... تمن ادموعى كى اشبوب اشتا

النوم جفها ..... كاثر عليها نوحها ومشكاها

اللى قبل ما يسهر الليل بلاها ..... أطاول اغيابه ما اتصلش أبها

ظلم الايام و جورها ومدعاها ..... صارت وحيده ما عليها اعبا

تمت اتراجى من بعيد أمناها ..... الأقسام شالت والوداع بدا

دارت ليله ..... على قسم ناوى فى الرحيل وشيله

دنيا قسامى والنصيب مثيله ..... الا جرح من نعشق صعيب اكفا

تما مكانه كى افراد العيله ..... والقدر عالي فى أكباد سما

وأعذرت قسمى ما القيت وسيله ..... تميت نبكى فيه حتى نا

العين باكيه و دارت عليه عزا ..... الغالي تباعد والنصيب مشا .

من طرف **جمال المروج** 2012-10-02, 12:26 pm

سطير في جواجي القلب بكن الطبيب يبال لي حاملة

من طرف محمد الشيخي 2012-11-09, 10:17 am

اختيار رائع
واضح انك ذواق للشعر الشعبي

من طرف r+r=i love you 2012-11-09, 12:13 pm

حسيت كله الشعر الي تكتبو فيه كله علي الحزن بس حلو بس ننصحكم تغيرو موضوع الحزن واتخشوا في شعر مفرح شويه

من طرف **العاشق الصغير** 2012-11-20, 8:43 pm

مشكورين وبارك الله فيكم علي المرور الطيب

اللي هذا يحكي علي فاهكه

والموضوع متناول للجميع اللي عندا حاجه اينزلها

من طرف **العاشق الصغير** 2012-11-20, 9:48 pm

يوم الفراق وداعه
على شر من ذوقة الموت اجراعه
رفيق الغلا

يوم الفراق قسامى
وصارن وفظت ياعيون الدامى
امغير نالى ديمه ارقاق عزامى
سيه بلا سيه يمد اكراع
الخاطر ويبقا ياعكاس ايامى
ويقول يانا عالغلا الى ضاع
ونا ملتهف ذايب عليه حمامى
وهو الغلا من جملت البوزاع
وداعى عليه ودم جرحى حامى
وعارف ادعاى امعاه يكسر باع
ونجيبه ويكسر خاطرا قدامى
والله له العفو وللنبى الشفاع
واحنا هله الطوله من اشراف نسالى
مرات نصنعوه انكان قام صناعه

من طرف **العاشق الصغير** 2012-11-26, 9:20 pm

يا شباب وداعاً..من حاشاً طروف الجسم ما ينْباعَن..فارقت تَرْبَح
يا شباب تهايا
أيّام عروانَك فِي زها فِي غاية..أيّاماً وعندي بالعناد هواية
معانِد بنات القُوْد جَبْر وطاعَن
واليوم لِيْد ما تقْدَر عَلَى الكَبّاية..وكافة المفاصِل كلّهِن يُوجاعَن
يا شباب انْسِيْته
في شَيّ واجِد صار ما عَدَّيته..كَم وطن جُوبَة عَ الكراع مشَيْته
ياما زهَن لَنْظار ياما راعَن
وياما رفيقي بالعَلَل سَلَّيته..وفاتَن أَيّام اسْماح ما يقْداعَن
ولا شي عمري بالنّظَر راعَيْته..ولا تقول كانَن لا شرَن لا باعَن
يا شباب غريبة
فَوت الْحَبِيْب منَيْن فات حَبيبه..خصُوصاً بعَد وَدَّع تكامَل شَيْبه
وتَمَّ بالمسامِع دُوبْهِن سَمّاعاً
نْخاف م العَلَل مَرّات فِيْه الغِيْبة..يْجدَّن حَجايج يرعْبَن يفْجاعَن
يا شباب تعَدِّي
تفُوتْنِي ونا تَعْبان واصِل حَدِّي..ونا معاك نَسْعَى في الرّفَق مِن جِدِّي
وبَيْنا وصايِل رَحْم ما يقْطاعَن
وفِي ظنّ بالِي كان ما حَد ضِدِّي..نْخاطِر عَلَيْ جُوبَة فجُوج وساعاً
وبعَزْم وشجاعة كان طايل مَدِّي..وانْدَيِّر عَلَى الجارات وَيْن جْياعن
يا شباب مفارِق
أَيّاماً وكنْت معاي باتِع مارِق..خَفِيْف قَفزتِي تشْبه مثِيْل البارِق
بعَدل ولباقَة والْخطَى يسْراعَن
واليَوم منْخجِل ما عاد نَسْمَع طارِق..حَتَّى النّظَر زَوْلَيْن فِيْه يراعَن

من طرف **العاشق الصغير** 2012-11-26, 9:26 pm

ماعد ايامك يا زمان ايعــودن ولانكزذيليهن اجـــواد ايجـودن
يازمان ايردن
ولاهـن اللى يندن العيب ايعدن
امعاى بالسواد اينيرن ويسدن ومقسى اقلوبهن وين بحكام ايسودن
اخباث الطبايع يحسدن ويــودن ليام والنسامالهن ذرا لا مدودن
ماعدايامك يازمان ايعودن
ولاانكزذيليهن اجوادايجودن
يازمان ايولن
ويديرن جميل والفارغات ايملن
ويبقن امعايه يربطن ويحلن لايغبرن ولاهن اللى ينسودن
ضباب حزن من فوق العيون اجلن
دون خاطرى فالعمريوم ايذودن
ماعدايامك يازمان ايعودن
ولاانكزذيليهن اجوادايجودن
يا زمان ازهاله
اوفرج على مكيون ضايق باله
حمال سيتك وقتن اتجيه اقباله منظور بالفطام اللى اعزل ومغودن
ليام حزنهن والفرح داله داله خادعاتنا شورالقبورايقودن
ولاعدايامك يازمان ايعودن
ولاانكزذيليهن اجوادايجودن

من طرف **العاشق الصغير** 2012-11-26, 9:30 pm

من لاشى
يابال غايب يا عزيز على
ديما العين (اتنوح)

اتنوح ع البرانى
وتبكى على كل حد كان ايعانى
ديما حنـــــونه عزمها خلانـــــى
انشيل هــــــم الناس بين ايدى
مــــن كل لوعه مكتئب تلقانـى
ايبان الزعل والدمع فيها او فـى
يا بــال عنها غيـــبوا حبانــــــى
انظنى ابكاها العمر كلا اشـوى

على كل شى اتنوح
وتبكى انشافت دم ولا اجـــــــروح
ما عندها ف الحــــــــزن ديما روح
عـــــــــزم البكا ما هو شديد قوى
غالـــــى عليها الدمع وقت الموح
تقــــــــول هاويه لدموع تلعب بى
ماعـــــــد عرفته صدق ولا اطـــروح
قريب تنعمى ويطفى عليها الضى

من طرف **العاشق الصغير** 2012-11-26, 9:33 pm

ماعرفت كيف ننساك
وماعرفت كيف نجافى بجفاى جفاك
ياللى رحلت...
ماعرفت نبقى كيفك
نمسك عيونى وين يهلب طيفك
نجيب العذر نسامح خطا تزييفك
وكل السبب انى نعشقك نهواك
ماقدرت نبقى قاسى
ونقتل مشاعر حب قول احساسى
عشانك رضيت عاشرت همى وياسى
بيه أرتضيت فى سبيل رضاك
ماهو منى
نشوفك نضعف يبان فيا حنى
تنزل دموعى سيل غصبااا عنى
ترسم ملامح جرح يريد دواك
بيك رضيت
ولك نقول اليوم نا حنيت
نبقى مريض انكان ماطليت
راح النظر والصوت راح وراك
هك أقسامى
نبقى جريح صوبك بجرح الزامى
لومى على ليام كان ملامى
يحرق الشوق فى هلبتى يالاك

من طرف **العاشق الصغير** 2012-11-26, 9:39 pm

بكت بكتني سالن ادموعي عبرتي اخنقتني وقتا تلاقينا

ونا بكيت معاها وماتريد والي ع البكا ينهاها

وين ما بكت بكت اللي يالاها ونا زاد لاخر دمعتي اسبقتني

ياما نهيت العين عن مدعاها لاتبعّت رايي ولا سمعتني

بكت مشتاقه ونا من بكاها لوعتي حراقه

لاغيتها دارت جديد علاقه الحمت نارها كاس الغرام اسقتني

ونا بالعيون السود مالي طاقه وهي بالحراب الماضية طعنتني

بكت بكايه العين مالها سيره ولا سهرايه

مفيت ما علي ماضي قديم معايا عليها خطر حاست بعد راعتني

ونا من حذاها غير كامي دايا مشيت شورها عطف الحنان همتني

بكت منظامه تبكي بكا عيل نهار فطامه

عليها خطر ماضي وجا لوهامه شلال دمعها داير اللي شغلتني

وراها الخاطر رايجات ارمامه الا مغير قسميتي اللي غلبتني

بكت وانهالت ياما جرى للعين ياما عانت

لاسلّمت للياس لا ستكانت ولا نسيتا م البال لا نسيتني

امعاي خلفت لوعة غلا مازالت اتناوض وتنقص وين ماهفتني

بكت بكتني سالن ادموعي عبرتي اخنقتني وقتا تلاقينا

من طرف **العاشق الصغير** 2012-11-26, 9:49 pm

خلك م الكلام،،، أن قتلك درت في أغيابك عزام، أمغير كلام....
خلك ياأحبيب،،،يابوقلب طيب يا الطيب،ياالبعيد مني يا أقريب
ياجياي ديما في المنام عمري فيك ماشوقي أنسيب،،،
عمري فيك مانيس أقسام... مهما حط منظاري أوطيب،،،
مهما دق دقاقي أرمام... ظنك في عمري ما أنخيب،،،
لك مازلت وألغيرك حرام...
خلك م الدواوي... فيك العقل مسكاته رساوي...
فيت عليك ماعندا حكاوي،،، يابو دور كي ريش النعام,,,
أويابوعين كي عين النداوي... أويابوهدب ظلل على الميام,,,,
أويابوجوف تحتا وسط خاوي،،، أتقول أضراب داير على الطعام...
نسيتك وين نلقالها فتاوي،،،،أوين أنذوح بدموع الليتام...
صعيب النسو حتى للجلاوي،،، يابال أنت مي عشرة أيام...
أمنول صوم وانافيك غاوي،،، أولي أبعدك سطاشرأصيام...
خلك م السهاري... أغيابك راه حوسلي مداري...
مافرزت ليلي من نهاري،،، دونك توق توقت بدر تام...
أندارن عزم في أغيابك أنضاري ،،، أوقلت أريت مكحول ألميام....
عليه أنعد ماسيه أنواري،،، أمعاه أنكون قاسي في الملام ،،،
أوين أتغيب لك عيبي أقراري،،، أوين أتوق نسكت والسلام...
خلك م القطاف .... مافكرت لحظه في الخلاف...
بلاك العقل ياصايف أصياف،،، أوموش بعيد يلفاله عدام...
يجري جري شور دار التلاف ،،، أوراك أسببه ياغالي حرام...
تنظر فيه مريوح إيتراف،،، أمغير عليش قلت ها لرحام...
أنكان صحيح في صوبا أتعاف،،، عند العقل راك صاحب مقام...
ما للعين تعرف شي أسلاف ،،، طبك فيه ياغالي حرام،،
أوعد القبر ساعات الظلام.... خلك م الكلام,,,،
أن قتلك درت في أغيابك عزام، أمغير كلام..

من طرف **العاشق الصغير** 2012-12-18, 8:37 pm

يالليل مانك عادي... جوك سكون.... وسمح ريتك هادي اتجـــــــــــي للبكـــــاء يالليل فيك سكون......
وفيك القمر والنجم دارن لون ويسمر اللي من فقدهم مطعون.....
وفاقد غوالي كيف فقد اريادي اللي اليوم ياني جيت منهم دون....
وهم جايين بعيد مني غادي ... ونحوس وين مانبحث اللي مدفون....
بحثة العادي قول والحسادي ويا وقت منك مانظرت العون.....
فرحت غيري وانت جيت قصادي حايس بعدهم ضاق بي الكون......
لطيتني واذهبت عن ميرادي الدنيا بلا لولاف كيف تكون........
موحش خلاها والصيود عوادي مرايف عليهم والجهد بلهون......
وقاصر علي واجد وطال كسادي تعتهم يقولو في الغلاء مجنون.....
وبارح وراهم عالقديم ينادي يرخص عليهم كل شي ويهون.....

م ن ق و ل

من طرف **العاشق الصغير** 2013-03-08, 8:47 pm

الشاعر: سالم عوض ارحيم

يانفس توبي عالخطا و نقدعي...و طبي طريق التايبين ارتدعي

لا تنغري...بقو الشباب و طيش له تنجري
و تبقي و راها تنيري و تمري...خطيهن اخطا النعيل لا تتبعي
و يبقى عليك اتقول شيخ ايقري...تاخذي علي طبعه و به تنطبعي
ايسيطر عليك و كي تري اتبري...منه و من وسواس له تستمعي
امفيت ما بذكر الله به تنحري...حب الرسول و خشيته تستدعي
و تروك زهو دنيا مالها تنكري..سرابها ايشيلك فانيه تنخدعي

يا لوامه...الله خالقك فينا خيال ندامه
ديمه علينا بالخطا تاوامه...ما النصح ناصح ما بيا تنصدعي
تبيعه معانا فالحياة بارامه...رفيقت شقا كيف الرفيق المدعي
واتي مقبع للوكال اكمامه...ان لاواك مرة خايبه تنقبعي

يا لاماره...لكافة الشهاوي تطلبي دواره
عليك من تعذر باطلات اعذاره...ان خصن عذارك غيرهن تبتدعي
منك جميع العاقلين حياره...اخلاف قولهم قولك امخالف بدعي
معا كل معطش وارده لابياره...حنينه ايسوقك للضما تندفعي

يا الهلوعه...يا اميعده عالعقل قبلن نوعي
فيه ساكنه فالقلب بين اضلوعه...القيت فيك مجرايه و منك نبعي
ما تبعي عاقل اتجي في طوعه...و لا لامر ربك راضيه ترتجعي
اتضلي اللي في يديك حط اصروعه...غويه بلا شيطان ما تنقرعي

انتي معاك ما والي ضمن مطلوعه...مرقوع دوم صاراعك و ما ترتقعي

م ن ق و ل

من طرف القديسة 2013-03-08, 9:16 pm

تربح عدي ...مادام درتها نا نقولها من جدي
ياشباب ما ترجى و تربح عدي
امشي مربوحة.... نا مالجفا واخذ عليه و موحه
تمت في حياتي دايرة طبوعة ... تبرم ادور خاطري و تكدي
شكرا اخي العشق الصغير
واللهي قصائد غاية في الروعة
و جت عالفاهق

من طرف **العاشق الصغير** 2013-03-20, 12:48 am

مشكوره وبارك الله فيك أختي الكريمه القديسه
من العاشق الصغير إلي كل ألاعضاء والزوار - صفحة 7 82845955

من طرف ارفادية حرة 2013-03-20, 1:52 am

ياالله ياالله ياالله
فعلا انت العاشق الكبير و ليس الصغير

من العاشق الصغير إلي كل ألاعضاء والزوار

من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار