من العاشق الصغير إلي كل ألاعضاء والزوار

من طرف **العاشق الصغير** 2012-05-11, 4:49 pm

تذكير بمساهمة فاتح الموضوع :

تلاقيت نا وياه .......... ماشي وجنبه ماشيين ضناه
الغايـــب بعد مُده
امعاه عويله ............. قابل وكانت غايتي نمشيله
انسلم عليه ونعاتبه ونحكيله ........... ليش الغياب وليش طال جفاه
واذكرت كي ريته اسنين جميله ........... أياماً وهو فاضي ونا مشكاه
كنا انتلاقوا كل يوم وليله ........... وماضي توارى كنت فيه امعاه
وانقطعن أخباره وين شال رحيله .......... عليـّا تباعد كنت جار احذاه
ودورت واجد ما لقيت وسيله .......... ونحسابه الغالي ما يطول رجاه
واليوم قابل بوعيون كحيله .......... وما حس كي ماريت من يالاه
صفقت بيديا ونا نوميله ........... وانقول في سري الله الله
امعاه أصغاره .......... غض النظر واطى عليا أنظاره
عديت شوره ودمعتي منهاره .......... وتميت نمشي فالطريق وراه
تمتمت كلمه قلتله عِباره .......... وعاودت شَريط الزمان امعاه
حاولت نحكيله انجيب إشاره .......... وانجيب ذكرى اتذكره بغلاه
لكن تبينلي من عيونه اخساره .......... ناسي الماضي وكل ما قلناه
ولا جاب مني شئ في تذكاره .......... وحتى كلامي ما فهم معناه
مديت يدّي وقلتله ببصاره ......... كل شئ درته فالحياة تلقاه

مابت البال تفــارق

مابت البال تفــــــــــــــــــــــــارق...............صورة عزيز النوم مني سارق

حتى وهيه بعيـــــــــــــــــــــــــده...........تخطر فلانه كل صبح آكيـــــــــده

وتسبق اوقات النوم فمواعيــــده...........لين خاطري ماعد اقدر ينساهــــــا

مقهور من صغا ليام جاير كيـــــــــده...........هيه انغنت عدّت وهوه بلاهـــــــــا

ذايق امرارالوقت وتمرميــــــــــــــده..........وخطور طيفها وقلّة العين هناهـــــا

وماعاد عنده ف الحياه جديــــــــــــده..........عايش يعاود في قديم غلاهــــــــــــا

ضاقت عليه الواسعه من ريــــــــــده..........اللي الياس عن شبحه بعيد زواهــــا

حتى بعد غنواها............مابت تفارق خاطري ذكراها.............معاي سالمة

مابت البال تفــــــــــــــــــــــــــارق...............صورة عزيز النوم مني سارق

ومقلّل هناي وزاد كبدي حــــــــارق...............وملازم العين وجاي دون غطاها

حتى وهو غني عنّي بعيد وغــــارق...............فهموم واجده نفسى وراه خذاها

ما والفت لآخر اللي ما فـــــــــارق...............يماطل وما غيّر نهار اريــــــــاها

متمكّن غلا لــــــــــوّل امبيّن زارق...............ويظهر ولو مليّت غيوم سمــــاها

صحيح خلّت الخاطر شارق...............وغنيّت ولكن عاز من يسواهــــــا

حتى بعد غنواها............مابت تفارق خاطري ذكراها.............معاي أفلانه

تحيـــــــــــــــــــــــاتي
أخوكــــم
العاشــــــــ الصغير ــــــــــــــــــــــق

من طرف **العاشق الصغير** 2012-08-26, 2:22 am

وين تجبدي اللي فات*** اتجي سايلة يا عين بالدمعات خير دعوتك
وين ما انقول نسيت ***اتجي سايلة بالكدر والتنهيت
ويا ريت تنسي او تصبري يا ريت *** تعيشي الحاضر تترك اللي فات
كيف ما خسر صدام في الكويت *** سلمت فيها رافع الرايات
فالأول أعلنت الحرب وتحديت *** أو صارت خيانة في بعض من القوات
نهوني أو قالوا سيبها ما بيت *** فاوضتهم ورفضت خوذ أو هات
ولا متت لأني حي وتهنيت *** لومي علي الأيام خوانات
وييه ييه ياما شفت ياما ريت *** واليوم قعدت كان ذكريات
وين تجبدي اللي فات *** اتجي سايلة يا عين بالدمعات خير دعوتك
وين ما انقول خلاص *** او نهجم بجيشي على جيوش الياس
بصواريخ ومدافع أو دبابات *** يخطر سريب أديرلي في هلاواس
إدورس علي أجيبلي في حاجات *** خايف إعدوها علي الناس أو نندم أو نكره في الندم بالذات
أو صبراً صبرته فات كل أقياس *** وأيام فرقتك ما تنحمل مرات
أو بإيدك سقيتيني مرار الكاس *** وأشربت لن اروين من نخبات
وأنداس تحت الياس كل أحساس *** أو الأحساس زاد الباس به او مات
أو وين تجبدي اللي فات *** أتجي سايلة ياعين بالدمعات خير دعوتك
وين ما انقول اتهون اتجي سايلة بدموعها الأعيون
وين يسقط في الودن حرف النون *** نقفز نذكر احروفها الأخرات
أنهتري بلا رادى كما المجنون *** نرتاح تقرأ في بعض من الآيات
بلهون بكل حالتي بلهون *** بعد غيبتك يا سمحة الصفات
يا بو ميامي سود من قال*** من بعد الفراق اتعود او نشابحوا يا بو ميامي سود
يا بو أرموش اطوال *** جرحك نقل ثاني او دمه سال
واليوم وقت نرجى فيك عالملال *** أو حتى صبرت الصبر ليه أحدود
نمشي جهامة الحال في أسوء حال *** أنذهبت الشيرة او رحت كيف العود
كان رجاي أهبال راه أهبال *** أو كانه وفاء يخده بلا بارود يا بو ميامي سود
يأم الهذب مبروم*** ما دامني من شبحتك محروم يحرم على عيني لذيذ النوم
كما حارمة مكة على اليهود *** ومن البال ما ننساك حتى يوم ما دامني موجود في الوجود
وأنموت وأنتحاسب والقيامة اتقوم *** وأنجي نطلبك من خالقي المعبود
واللي طلعوني لحضرتك مذموم *** إيصير فرحنا أو يبقوا عليه أشهود يا بو ميامي سود
وتلاقينا من بعد ما حنوا اليام علينا *** ياما شبحنا عكس ياما رينا
أنباتوا سهارا والعباد ارقود *** أو ياما اشتقنا لبعضنا او حنينا شوق الفراشة لعبير ورود
أو ياما شكينا أو بالدموع بكينا *** أو شهدت علينا عين كل حسود
صبرنا رجينا ما انهار نسينا *** أو بيني أو بينه وافيات اعهود
يا بو ميامي سود من قال *** من بعد الفراق أتعود أو نشابحوا يا بو ميامي سود
عزاء في الغلاء بعد عشرة طويلة *** أو فيك يا جميلة أو في عقل تايه أمضيع دليله
عزاء في الغلاء بعد عشرة أو جيرة***أنذهبت الشيرة من فراق بو عين سوده كبيره
أو مكتوبلي باش هذا أنديره أو نقعد أسيره *** مرهون مجنون أو ما أندير غيره
أو مهناش ما باش هالبخت خيره *** مع هالصغيرة اسود كما أعيونه والظفيره
مشكاي جتها في حبي النكيرة حكاية طويلة *** حكايو مائة ألف ليلة أو ليلة
عزاء في الغلاء بعد عشرة طويلة *** أو فيك يا جميلة أو في عقل تايه أمضيع دليله

من طرف **العاشق الصغير** 2012-08-26, 2:23 am

وين مانلقاك*** يتلخبط القلب ايسير فيه ارباك تدرى ليش

تدري وين***علي قولهم والعين جت في العين

نشعر برعشة اتسير في ليدين ***ويعجز لساني في الحديث امعاك

امنيتي انريد انقولك يا زين*** عايش حياتي في أوهام غلاك

تدري كان ***يا في القلب داير لك مكان

نحلف حلف ما خشه إنسان ***غيرك غير ما واحد امعاك

امفرش ورد ومعطر حنان *** نوره بيك ومظلم بلاك

امقهر راه من ظلم الزمان *** ويرجى فيك واطاول رجاك

تدرى ليش *** امغير امعاك ما نقدر انعيش

من طرف **العاشق الصغير** 2012-08-26, 2:25 am

ماجد شي جديد الافاهق***************** كبير وكل يوم يزيد
ياصاحبي
ماهنلك شي تغير************** مازال صاحبك فى الحياة متحير
لابن ايامه بالزها اتغير************ ولابن افكارة ع الوهام اتحيد
واهم يحساب الطريق بات اقصير******* ثاريه مشوار فاحدوده بعيد
ماهناك شي انجد*************** من يوم ما صوب العزيز انهد
حياة صاحبك اليوم غير اتغد************ لافرح فيها لازها لاعيد
جميع ما انشوطه لاورا يرتد**************امعاند ياس تيارة عنيد
ماهناك شي تبدل****************** ولاهناك شي يارفيق تعدل
مازال صاحبك في الحياة متبهدل****** اجروحه اكبار وماهناك ضمي
بين الحياة والموت بات امجندل******** طايح امهرد م الزمان غميد

من طرف **العاشق الصغير** 2012-08-26, 2:27 am

ايسيلن دوم...........مانلومهن ولانقدر عليهن انلوم

لنظار فى غيابك
ايسيلن ديمه........لنظار والخاطر ماهناك عزيمه
خلانا افراقك يا عيون الريمه..........فالسماء نرعو فالنهار انجوم
ولاعاد منى تفهمــــــو تكليمه...........انحوس كى يخطر حوست المفطوم
ولنظـــــــــار عندى ادير وليمه...........على ما فخاطرى وخاطرى مضلو
وحال خاطرى توا ايطول سليمه...........غير رد من بوها خاطرى مصدوم

ايسيلن دوم
ايسيلن سيل.........لنظار فغيابك فيوم طويل
عارف ابكاهن ما يرد الشيل.........ونرضى بنصيبى فلاخره مفهوم
ولكن عرفنا اعذرونى بعد تحليل..........الها حق غايب له اطناشر يوم

من طرف **العاشق الصغير** 2012-08-26, 2:30 am

تصـدق انــي مشتاقـــلك ..... رغم الجفـا و الصــد !!
تصـدق انـي محتاجـــلك ..... و ما نريد غيرك حــد !!
ياللي كسرت بخاطري و جرحته
على راحتك يجري و ما ريّحته
جافيتني هذا جزاه الود
تصـدق انـّي رغـم الجفــــا نبـيــــك ..... و انــك قريــب فبّعــدك!!
تصــــدق انــي مازلـــت مستنـــيــــك ..... و ما درت غالي بعدك!!
نـارك و لا جنــة زرعهــا غـــيــرك
شوكـك و لا وردة بـدون عبـيـرك
جــزرك و لا من الغـيـر نقـبــل مــــد
تصدق انه طيري اشـتاق اقفاصــك ..... و اشـتاق ليـلي لفجـرك!!
تصــدق انـك غالـي عــليْ بيأســــك ..... و بقسوتك و بهجـرك!!
يـا مــّر فـي ريقـي مثيــل الشهـــد
يا صوب رافقني و نا في المهد
نهديـك عــمري كـان غيـر يسـد

من طرف **العاشق الصغير** 2012-08-26, 2:31 am

موش اوقاته ويحوس علي العين بمهاياته ايجي في اوقات قديم
ايجي في اوقات الروقه*****************وايحوس علي العقل ينصب سوقه
الا العين تضلع م الشقا ملحوقه*************وتسمر هضاك الليل من سياته
ويجيها بذكريات سمح التوقه**************وتفرح دقايق حلم بملاقاته
اللي الكبد منه صايفه محروقه*************والنار جورت طالت الجوف هفاته
نحلف عليها حلف مي مطلوقه*************طار نومها والليل مارقداته
اتقول للبكا ولعازتي مخلوقه**************تحكيبه نهار العين مسع راته
وبمنجل غلاها ياس قص اعروقه**********ونظرها علي ميط العرب واطاته
وفي كل حاجه فالحياه مسبوقه************وهي عاقبه في كل مادارته
عطيب حظها من وقتا مخلوقه************دره كبدها في دمعها حطاته
وانكان هي بكت والله مي محقوقه**********لوكان جرحها ما حم ما حساته
ومنها الضحكه لوله مسروقه*************وجميع مايبغدد فالحياه حقاته
---------------------
ايجنها اوقات اتغفي******************امكفي امعاها لولي واموفي
الله يرحمه ويسامحه متوفي**************غلاها اللي تحت الوطا اردماته
وتحساب صبرها نار القديم ايطفي**********وهي صبرها خللف مرض دساته
اركبها الشيب وخيرها متكفي*************وما من امرار الصايفه اشرباته
وهي عقاب ايام غير اتوفي*************والعمر فيد الله في ساعاته
-----------------------
في راحتا**********************يخطر قديم اتنوض زعزاعتا
نلقانها في روحها دارته**************لوكان غير مالساعه الراي خذاته
ماراه طاحت فالوطا دمعتا************ولاشيبها بملقاطها القطاته
تحسابه بعيد الدار كيف سعتا**********في منزله مي هذي شي حطاته
وشكت للنجوم العين سهرايته*********حتى القمر من غيبته شاكته
نار خامده برياحها حايتها***********لهيب بك في قشواش ما طفاته
--------------------------
ايجي في اوقات هناها************وايحوس علي العين كي يلقاها
قديم رايقه تقفز اتوج اغطاها********اقطع رايها ياريت ماوداته
قليلة الوالي امعيطين وراها********اليوم باعها بطلوق وين شراته
وقول خاطري مو هضا رد اكفاها****الصاحب على الصاحب ايبيع عباته
موش للسمور ودمعها خلاها*******اللي العين ماتحلف الا بحياته

من طرف **العاشق الصغير** 2012-08-26, 2:32 am

انشاكي فيك يانجمة اسهيل**************علي ماصار للعين وجرا
فقد اولاف ذوقني الويل***************ارويت امرار من كاس الشقا
عندي ليل مطاول طويل**************لا له فجر لا صبحه ضوا
وعندي عقل في رايه ضليل************ننصح فيه ويدير الخطا
وعندي عين ماترقد الليل*************رفيقة دمع حرفتها ابكا
وعندي قلب مجروح وعليل***********نزيفه زاد مافاده دوا
وعندي روح راغبه فالرحيل**********بعد لولاف ماتريد الحياه
وعندي نفس موساهل اتميل*********اجداب وعر ولا ذل وعفا
وعندي رجل مالقيت سبيل*********توصل بيه لديار الزها
وعندي دمع ع الغايب ايسيل********نزيل امطار في وان الشتا
علي الناس قابلين الجميل**********ان ماذكروك ياسمح العضا
اني ننساك يبقى مستحيل**********ايام العمر في فراقك عزا
افراقك صار مكتوب الرحيل********هضاك الود بدلته جفا
ونا ع الصبر ماعندي بديل*********في لولاف مقطوع الرجا
في التوراة وصى والانجيل*********وقي القران نازل مالسما
الصبر الصبر ياصاحب جميل*******من مولاك تاخذبه جزا
يوم احساب ماينقص الكيل*********نهار الحشرهو يوم الفنا
اصغار اكبار شياب وعويل********وكل اجيال حتى مالنسا
كان الخير ميزانه ثقيل**********وناهي النفس عن دور الخطا
جنة خلد واعناب ونخيل*********فالفردوس وامعيشة هنا
ولو بالشر ميزانك ايميل*********احساب عسير في يوم الفنا
ونا في درب ضيعت الدليل*******وعندي فيك ياربي رجا
نلقى عزم نصبربه وحيل********ننسى صوب ماضي وانتهى
اندير جديد يبقى لي بديل********يمشي معاي في درب الوفا
بين الناس ماعنده مثيل*********شمع الفرح في ليلي ضوا

من طرف رؤوف عوض الجبالي 2012-08-26, 2:32 am

مشكور على الاهداء حلوه منك

من طرف **العاشق الصغير** 2012-08-26, 2:35 am

ناضت وهي توميله******************العين بالغطا وتقول فايز جيله
طار نومها
ناضت وهي بغطاها*****************تومي بعد طيف الغوالي جاها
اصداف وين مادوبه النوم غفاها*********ومازال بين النوم والتعسيله
وقالت بعد زاحن غيوم سماها**********وانفكن طلاسم حلمها تاويله
يانوم عندي عين طال رجاها**********وانت عارفه طول الرجا تبيله
ويانوم عندي عين ليش معاها*********ردود زينها بعطيب توفي كيله
يانوم عندي عين كابر داها**********وجياب الدوا غايب غياب الحيله
ويانوم عندي عين من غالاها********قدام العرب تقدر غلاه اتشيله
ويانوم عندي عين زول امناها*******لوكان في اخر الدنيا تبي تمشيله
ويانوم ماكفت العين ابكاها*********الا وين مادارت عزيز عزيله

من طرف **العاشق الصغير** 2012-08-26, 2:36 am

مشكور وبارك الله فيك رؤوف علي المرور الطيب

من طرف **العاشق الصغير** 2012-08-26, 2:37 am

لاهي حر لاهي شر موتي موت*************علي غايبك نوحي
ديري طار***********************ولمي عجايز عارفات اكبار
وعددي وقولي فيي دار ودار**************ونوحي عليه وهدمي لبيوت
وسيلي عليه بدمع ليل نهار***************وصيمي اصيام وماتذوقي قوت
وقولي الغالي بوعيون اكبار**************عدا بقسمه ولقسام ابخوت
والهم فيه ماترضى ولاتختار**************الناس لوله قالت خبر مثبوت
امعاي مافزع لي صاحبا لاجار*************ولاشي داروالي امعاه الخوت
انكمل حياتي كلها صبار****************وماعمر قدري ناخذه مشحوت
ابروحي انعاني في صهيد النار************وياسي اللي فايت امعاي الفوت
ارياح سو هبن عالغلا وانهار*************وطاح بينا طيحة اوراق التوت

من طرف **العاشق الصغير** 2012-08-27, 12:12 pm

لنا الله نا وياك @ داوينا امداوي غيرنا .

من طرف **العاشق الصغير** 2012-08-28, 2:54 am

نرحل معاك واخد على الترحال ... من صغر سني مالقيت دلال
نرحل بــــلاك بروحــــــــــــي ... ونا مالشقا والياس طايل نوحي
حتى كان تنزف في الكنين جروحي ... قلبي مكون للجفا حمال
ونا يالعزيز نريد غير سموحي ... وانت مسامح قسمك بدا موحال
نرحل بــــــــلاك انجرب ... ونا واخد على سوق الرحيل امغرب
مالقيت حاجة في غلاك اتطرب ... امفيت الشقا منك الخاطر نال
وديمة ابروحك في الغرام اتخرب ... بسبلة وبلا سبلة انت زعال

من طرف **العاشق الصغير** 2012-08-28, 3:37 am

تـــــــــسأل عــــــلي عــــــــنوانــــــي .......... الهم والشقا و الحزن هم جيرانــــــي

خوذ أكتبه

في مـــنطقه معــــــــــــــــروفــــــه .......... بالياس راهي أفوصفها موصوفــــــه

الشارع الأول سيبه ما أتشوفــــــه .......... اللي ساكنه مالغدر ديما أيعانــــــي

أو ثاني شوارعها أسماه حسوفــــــه .......... سكانه حـــــــياره همهم بكانــــــي

و الشارع الثالث ننصحك ما أتشوفــــــه .......... زادن أجروحي فيه قبل نهانــــــي

و الشارع الرابع كل حد و أظروفــــــه .......... من هـــــم ناسا كربتي نسانــــــي

أوفالخامس أتلاقي دمعتي مرصوفــــــه .......... و الجرس تلقا أمسجله وحدانــــــي

الجيران كـيفي أدموعهم مذروفــــــه .......... شارع عليه الياس تما جانــــــي

من طرف **العاشق الصغير** 2012-08-29, 4:01 am

بكــــــــــــــــــــــــــــــــــيت ابـْـكـــــــَـــــــا ..... على عُمر ضـــــــَــــــاع وحلم راح مشا .

مقهــــــــــــــــــور من حالى .

بكــــــــــــــــــــــــــــــيت بلوعـــــــــــــــــــــــــــــــه .

على عمر ضــــــــــــــاع ومستحـــــــــــيل ارجوعه .

وقصة غــــــــــــــــــــلا فى داخــــــــــلى مطبوعه .

معـــــــاها اشـْقـِـــــــــــيت ومــــــــــــا عرفت زها .

سريب الغـــــــــــــــــلا خشيت فــــــــى موضوعه .

القيته عــــــــــــــــــــذاب . ومــــــــــــا القيت هــنا .

معـــــــــــــــايا القـــــــــيت النفس موش قنـــوعه .

اتريد الغـــــــــــــــــــلا . وما اتريد فيــــــــــــه شقا .

دارت غـــــــــــــــــــلا مــــــــــا تم حتى اسبــــوعه .

وتمــــــــــــــــــت عليــــــــــله معــاه .. جاهــــا داء .

لقت رُوحــــــــــــــــــها فى حُــــــزنها مصـــــروعه .

تقـــــــــــاوى علـــــــــــــــــيها .. ما القــــــيت دواء .

قعد حال قلــــــــــــــــبى امكســــــرات اضلـــوعه .

يحكــــــــــــــى على حــــــــــــاله .. ولى شــــــكا .

ويامــــــــــــــــا اصَّــــدَّن فى الزمــــــــان ادروعه .

لكن اخســــــــــــــــــــاره اليــــــــــوم طـــاح هوا .

ويامـــــــــــــا بَـــرقْ نجمـــــــه .. قـُو ِى اسْطوعه .

واليـــــــــــــــــــوم حالــــــــــــــه شين . تم .. طفا .

ما عــــــــــــــــــاد ينفـــــــــع فى الجــديد اولوعه .

مَسْحُــــــــــــــــــون منــــــــــــها نيــــــن راح هبا .

القـــــــيت السعــــــــــــــــاده فدنيتى منــــزوعه .

والحـــــــــــــــزن قسْـــــــــمى . من نصــــيبى نا .

موال الغــــــــــــــــــــلا نا ذبت فـــــــى مشروعه .

راحــــــــــــــــــــن اسنيـــــــــنى وما ايفيــــد رجا .

وصــــــــــــــــافن جنــــــــــــــاين كاينـــه مزروعه .

وصــــــــــــــــارن صحـــــــــارى واسعــــــه وفضا .

حيــــــــــاتى غريبـــــــــــه امزيفه ومصنـــــــوعه .

ما ايفيــــــــــــــــد فيها انديــــــــــــر يــــــــوم غلا .

هذا نصــــــــــــــــيبى وجـــــــــاى نا فــى طوعه .

مكتـــــــــــــــــــوب من ربــــــــــــى .. نصيب وجا .

قســــــــــــم ونصيب متعــــــــدد .. فريد فـ نوعه .

فـَـــــــرَّق حبــــــــــــــــايب عايشـــــــــــين سوا .

وفى كل وقـــــــــــــــت اخبـــــــارهم مسموعه .

غزير دمعــــــــــــــــــهم .. نازل اسيــــــول اشتا .

جو الغـــــــــــــــــــــــلا واعر صعــــــيب اطلوعه .

وهدى نصيحــــــــــــــــــه .. وما انريــــــــد جزا .

وما اديـــــــــــــر فى عُمــــــــرك اللى ممنوعه .

وترجـــــــــــــــع بعد لـُوعــــــــــــــــه .. ادير عزا .

بكــــــــــــــــــــــــــــــــــيت ابـْـكـــــــَـــــــا ..... على عُمر ضـــــــَــــــاع وحلم راح مشا .

مقهــــــــــــــــــور من حالى .

من طرف **العاشق الصغير** 2012-08-29, 4:02 am

صعيب اخطورك........

صعيب اخطورك....وين تخطري يخطر خطا بخطورك.....يا الجافية تما
صعيب ايخطر.......يقلب امواجع والجروح اتسطر
ماضي سواده كاني نذكر.....كيف السواد اللي املون حورك
امغير السوايا هي اللي اتحكر.....منك سبق عيبك وياتي دورك

صعيب عذابه......اخطور سيتك يم العيون رغابة
كل شي فالدنيا حسبت احسابه.....الا خطاك اللي امهفت نورك
وعيبك اللي ع العين دار ضبابة.....زاد الخطا وقف رحيلي شورك
...

صعيب الشوفة.......اخطورك اللي خالي طرف م الروفة
وفيه الخطايا كلهن معروفة....سية ورا سية وراهن جورك
ومنك العيبة في ورق موصوفة....سوا تخطري والا ايتم احضورك

صعيب ايصدع......اخطورك اللي مليان عيب امردع
حلف خاطري ماعد جديد ايقدع.....ولا عد جديد ايخش هول ابحورك
ان بعتي خطا لازم عليك ايقدع.....انتي الخطا هو نجمتك واسمورك
صعيب اخطورك

من طرف **العاشق الصغير** 2012-09-25, 9:10 pm

>

يـــــــــوم وداعــــه ..... نزلن اسيـــول فجـرته منطاعه .

اللى صـــارلى يا ناس .

اللى صـــــــــــــــــــــــــارلى من صـــــــــــــوبه .

يـــــــــــوم الـــــــوداع اتقــــــــــول فى غيبوبه .

سلـَّـــــــــم علـــــــــــــَّيا دارلـــــــى لهلـُــــــوبه .

وسافــــــــــــــــر مع غيـــــــرى . رفع اشراعه .

بقيت فمكـــــــــــانى وحــــــــــــــــالتى مرعوبه .

إلا العيـــــــــــــــن تبكى مـ الـــــــــوجع ملتاعه .

والصــــــــــــــــوت منـِّى راح وقت اقــْــــرُوبه .

وين مــــــــــــا اصبــــــــــاعى لامسن لصباعه .

والسمع عنـــــــــــــــــدى راح دُوبــــــــه دُوبه .

حكــــــــــــالى كـــــــــــــلام وما فهمت اطباعه .

والــــــــــــــــرُّوح منـِّى القيتــــــــــها مَسْلوبه .

والقلب نــــــــــــــاض وفـَـــــــــزْ بين اضلاعه .

حالــــــــــــه غــــــريبه اتقـــــــول جاته نـُـوبه .

وسبحــــــــــــــــان من رَدَّه نبـــــضْ واسْتاعه .

حــَــــــــواسى الخمسه وَقـَّـفـَـنْ بـ اعجـــــوبه .

ورَدَّن بعــــــــد عـــــــــدَّا خِــــــــطِـى بـ كراعه .

يــــــــــوم الوداع القيت فيـــــــــه صعــــــوبه .

القيته مــــــــــــرار وكاثــــــــــرات اوجـَـــاعه .

لحظـــــــــه صِعـِيبــــَـــــــه امْقــَـــدَّره ومكتوبه .

لازم اتصِيـــــــــــــــر فـ وقتــــــــــها والساعه .

إللى قبــــــــــل مــــــــاهى وارده ومحســــوبه .

لكــــــــــــــن نصـِـــــــــــيبى جــــــــابها تِدَّاعه .

وهدا نصــِـــــــــيبى امْصَكـــــــــــــرَات ادروبه .

ومـ القســـــــــــم عندى صــــــــــار فيه قناعه .

وهدا الزمـــــــــــــــان بقســــــــــوته واعيوبه .

قـــــــــــــاسى عَـلـَىْ ومـــــا ايفـِــيدْ اصــراعه .

منـَّـــــــه تـَعـَبتْ وشـِــــــــــــيرتى مذهــــــــوبه .

معـــــــــــايا صِعيب وضحكتـــــــــه خداعــــــه .

وندعى لــــــــربى اتكـــــــــــون هـــــادى توبه .

انـْبـِـيعه غــــــــــــــــلاه. كـِيــــمَا غــــلايا باعه .

يـــــــــــوم وداعـــــــــــــــــــــه ..... نزلن اسيـــــــــــــــول فجـــــــــــــرته منطاعه .

اللى صــــــــــارلى يا ناس .

من طرف **جمال المروج** 2012-09-25, 9:54 pm

رد بالك يالعاشق راك ضعت هههههههه

من طرف **العاشق الصغير** 2012-09-25, 9:59 pm

يستر الله ياحاج جمال

من طرف **العاشق الصغير** 2012-09-26, 1:18 pm

جيبوله اقدم له عامين جرحه ما التم
طبيبه قال:جيبوله اقدم....جيبوله غوالى
فالتشخيص ذاكرها توالى وقال القلب دقاته عوالى
وقال الجرح ما كفف الدم
كم حاولت واسهرت الليالى كم عالجت جرحه ما التم
=جيبوله اقدم =.
جيبوله مراده راه الوضع مدهور ازياده جرح عطيب ما طباب فاده
انداوى فيه ما منه اسلم لا دكتور ولا تنفع عياده له جيبوه ما فيها ندم
طرا لقدم فى ساعات ارقاده وتمتم غير ما والى افهم
وحق الله نلقاها شهاده قال اقدم اسباب العدم
اشقو بيه متنكد نكاده ايجض امغير عبراته كتم
=جيبوله اقدم=
له عامين جرحه ما التم
طبيبه قال .....جيبوله اقدم

من طرف **العاشق الصغير** 2012-09-27, 12:51 am

الله .... الله

الله الله ..
مابا ايسلم وين ماريناه .. اللي گان غالينا

ماامعاي تگلم..
وحتى سلام الله مابا ايسلم ..

ماتقول منا ف الغرام تعلم..

ولاتقول غالي ف الغلا درناه..

خلا جميع الگون بيا ظلم..

لا عد عشره ولا اسنين زها ..

روحت منه في گنيني علم..

نادم عليها فرحتي بملاقاه..

في قول نا ماگنت بيه مسلم علي راي عبدو اللي نساگ انساه ..

لا انريد ايجي..
ولا ايديه نبيهن ايجن في يدي ..

يگفي سلامه من بعيد علي ..

الا غلانا ضاع وانسيناه ..

امقدر اظروفه اليوم عذره امعاه ..

عارف اريافه اليوم ماهو لي ..

غير امشارگ فرحته وغلاه ..

لگن صراحه اللي وجعتني اشوي..

ما اتقول گنا احباب ناواياه .. لو غير سلم ماوجعني شي .. وگل حد عدا في طريق خذاه........الله الله

من طرف **جمال المروج** 2012-09-27, 12:54 am

وندعى لــــــــربى اتكـــــــــــون هـــــادى توبه .

انـْبـِـيعه غــــــــــــــــلاه. كـِيــــمَا غــــلايا باعه .

من طرف **العاشق الصغير** 2012-09-27, 12:57 am

جتني اتوادع سايله دمعتا

وتقول انتلاقو من جديد ايمتا

وجتني اتوادع‎‏ يوم سفرها

جتني اتوادع منكسر خاطرها

حزينة وتبكي ولفراق قهرها

ما أقدرت تكمي مزعل عبرتا

السمحا كيف الحليب بشرها

العاطي عطاها هيل ما شحتا

رقيقة مشاعر ولفراق قهرها

أقعدت سايله بدموع ما كفتا

اوحتى نا بكيت الحق ما ننكرها

وعيني جميع أدموعها أذرفتا

والخاطر مصيبة وكاينا اعتبرها

امغيرشي مافيدي طلع ساعتا‎

وجتني اتوادع سايله دمعتا

وتقول انتلاقو من جديد ايمتا

وجتني اتوادع ساعة التوديعا

وسيلة الدمعه من اعيون وسيعا

وهي اتقول اتجدد من جديد البيعا

وجا كيدها علدمع هو فزعتا

ولنقانها ساعة لوداع فضيعا

وجربت تجريب ومثبتا لحظتا

مثيل السم في تجريعا

موش كلحد يقدر علي لحظتا

لحظة دقايقها اتمر سريعه

اتخلي الحزن مطاول بعد فوتتا

ولا عاد بعياطا ايدير نفيعا

الواحد ايعيط والعرب علمتا

علي قصتا ايزيدو اخبار شنيعا

ويبدوا هو سبب الناس تشميتتا

وجتني اتوادع

جت لوداعي

وتبكي ونا زاد علبكاء مداعي

في مره حضر كله الحزن أمتاعي

من ساعة اللي جت غايبة بسمتا

وتشكي ونا نشكيلها فوجاعي

ومرار لفراق اللي بعد غيتا

وهي اتقولي خلك ألقربي ساعي

وأنا أنقول حاضر وعبرتي كامتا

وأركبت من احذي وانا ثقيل اكراعي

ومااقدرت خطوة أنزيد في جرتا

وتخض في عبرا وغايبات افزاعي

وقلبي قريب الانفلق ليلتا

وجتني اتودع

ساعة اوداع الصعب للي باني

عليه أمالي وحبها وجداني

ساكن وما نقدر علي هجرتا

وكرهت اللي جاء ملعرب ينهاني

ويقول صارلي كيفك ايام سعتا

ودرت صبر داويتبا جميع احزاني

وطفن نواريني بعد ولعتا
‎فاض حناني
ونا الصبر جربتا جبر لقاني

القيتا وما خفف علي قسوتا

نار لفراق المن حرق قناني

اللي مايخفف شي من قوتا

وكثرن وساويسي النوم جفاني

سمرت لنجوم انقص في قصتا

اللي ذكرها واخذ عليه الساني

ومازلت دوم انجض من لوعتا

وحتي انفارقتني وغر بي زماني

وعني مسافة واسعه حازتا

الها وين ما نشتاق من دزاني

انطلع علي الشرهات في صورتا

بعد انشوفا يبرد صحي ريعاني

الصورا اللي لي الحنون هدتا

وجتني اتوادع سايله دمعتا

وتقول انتلاقو من جديد ايمتا

وجتني اتوادع

مانبيها

اتجين اتوادعني الله يهديها

امسامح وما نبي انلوم عليها

وما انقول ما جتني اتوادع حتا

قعدت في مكان ومنزوي خاطيها

يوم السفر ماجيت في اجلوتا

ولكن اتريد الصدق فكري فيها

دقيقه علي الحق ماغابتا

وطلت علي وجيت نا املاقيها

وصبت بعيد وخايفا صحبتا

وشابك قعدت ايدي بين ايديها

والقول همت تهمتني ونا نهمتا

القول منقطع بلكل حزين عليها

وهي علي رايت حزنها ارفعتا

سايله دمعتا وتقول انتلاقو من جديد ايمتا وجتني اتوادع ..

من طرف **عبدالحفيظ عوض ربيع** 2012-09-27, 7:14 am

بصراحه استمتعت كثيرآ بهذا الشعر رغم اننى ليس من الهواه

من طرف **العاشق الصغير** 2012-09-27, 6:22 pm

مشكور وبارك الله فيك علي المرور الطيب أخي عبدالحفيظ

من طرف **العاشق الصغير** 2012-09-27, 6:31 pm

نصيب شالني و العين شافت سوسه

سرح خاطرى طـلع اللى مدسوسه

نصيب خــــذانى

رامى على شطــــى جميع احزانى

تميت طـــــول الليل غير انعـــــانى

شايل اجــــروح او رايتى منكوسه

عــــاودت ماضى فى زمان زمانى

وقلـــبت بيـدى دنيتــى المنحـــوسه

القيت العذاب معــاى فــى وجدانى

وعيطه قديمــه ف الخفـا محبوسه

وصـــوره قــديمه رافقـت ديوانــى

فى وسط قلبى و خاطرى مغروسه

فى المصيف

مـــــوج البحـــر خطــــر عليا طيف

وماضى انتهى مانيش عارف كيف

وقصة غلا فالعمـــــر مو مدروسه

واوجـــاع جنـــى جايبـــات خـــريف

فى جــــوف قلبى القيتها مكــدوسه

حــــاولت نمســــك دمعتى بالسيف

نزلـــــن بلا راده ودارن حـــوســـه

والقيـــت روحـى ف الغرام ضعيف

ومـــذبوح ذابحنى الزمـان ابموسه

من طرف **العاشق الصغير** 2012-09-27, 6:32 pm

اللي يـا قمــر مرتــاح مـا يرعيلــــــك ..... نــا هـو اللي غـاوي السهـر فـي ليلـك

اللــــــي متهنــــــــــــــــــــــــــــــــــي ..... اللـي لا اغـوي لا منجـرح فـي ظنــي

لا يــــدورك لا يخاطبــــك متعنــــــــي ..... لا يعــد فـي حسـاب الفلــك يحصيلــك

نــا هــو اللــي فــي طلتــك مستنــــي ..... و نـا هــو اللـي بمواجعــي نشكيلــــك

و نـا هـو اللـي رايـح هنايـا منـــــــي ..... و كايـــن معايــا دوم وافــي كيلـــــــك

الا هالليلــــــــه لايمــــــــك نلقنــــــي ..... احتجتـــــك و مــا عبرتنـــي نوميلـــك

غبــــــــــــت فقدتــــــــــــــــــــــــــــك ..... مــوش مالفضــا محتــاج لمساعدتــك

تهــوّن علــيْ فقــد الغوالــي ردتــــك ..... فضفـض تقـول احكـي و نــا نصغيلـك

نمســـح دموعــك كيـف مـا عودتـــك ..... و نـا نقولــك فــوق الجبيــن جميلـــك

الا اليـوم غايـب عـن سمـاي وجدتـك ..... مـع اللـي رحـل شايــل بعيــد رحيلــك

شــــــال رحيلــــــــــــــــــــــــــــــــــه ..... و انــت مرافـــق موكبــــه تضويلــــه

قمريــن غبتـوا عــن سمــاي الليلـــه ..... بالله كيـف هنـت عليــك قــول دخيلــك

ضربتـين فـوق الـــراس مــوش قليلـه ..... حتــى بعـــذرك مــا قـــــدرت نقيلــــك

ظـلام شيـن مـا يضويـه ضــي فتيلــه ..... الدنيــا بـدت فــي العيــن مـا نحكيلــك

في الحلق غصه ، في الكنيـن شعيلـه ..... و عالخـــد دمعـــه فاقـــده منديلــــــك

من طرف **العاشق الصغير** 2012-09-27, 6:34 pm

مابت عليه اتوب
ــــــــــ
مابت عليه اتوب .... غلا من أمزوًق بالسواد أهدوب......وراه ذايحه
وراه أتنوح..............أتزازى وراه أبنارها وتنوح
العين فى غلاها فاقدا المربوح
ساعة أتشوفه ترتجف وأتذوب
وين تشتكيله بالعذاب الروح
إقول كل شى عالقسم والمكتوب
وإعدًى فى قيسه إفوتنى مجروح
مو هامًه دمعى إللى مكبوب
وراه أنعانى...............لا هو إللى قتلنى لا إللى داوانى
ولا هو نفرنى وقال خطانى
ولا هو إللى أمعايا إرضى بالصوب
أللا بين الحطايا منطنى خلانى
نجرى وراه أبشوق كى المكلوب
ما عمر فرًحنى ولا فاجانى
بزياره سريعه إديرها المحبوب
وما يوم صارحنى ولا سهرانى
أمفيت إبتسامة صبح واللا غروب
مابت أتًوب عليه.......وكل يوم ما مللت أتراجى فيه
العين من غضبها سامره تبيًه
وهى عارفه حبًه شقا وأذنوب
إجى فى منام الليل واتناجيه
وأتشق به مسارب فى الغفا وادروب
وتمر به عالقلب واتوريه
مناشيب حبه دايرا الهلوب
وأتزوًره للكبد وأتخلًيه
يشهد على جرحا ادماه سكوب
وتسهر أمعاه الليل واتشاكيه
وتبقى المواقى فروع م الدانوب
نين صبحها يصبح وما اتلاقيه
وتلقى الوساده غارقه فى أشبوب
وهو ما يندرى بالعين وايش عليه
سوى تنعما واللا عليه أتذوب

من طرف **العاشق الصغير** 2012-09-27, 6:35 pm

لي ايام عقلي موش صافي................................ايحط اوقات واوقاتن ايشيل

نار البعد تحرق يا اريافي..................................... بين الشوق والصبر الجميل

كيمن ضاع في وسط الفيافي..............................لا بتراب يخبر لا اسهيل

ولا داس ع الجمرات حافي................................. حامل غير من جوه غليل

عند الناس مستبشر وخافي.............................. تحت ابسام ياما من هويل

حائر نين نوم العين جافي ................................. لي اعيون ماترقد الليل

يخطر وين نسبلهن اطرافي................................ بوممشوط ع العاتق طويل

ايهوج احساس بالدمعات ضافي.......................... بعيطه كيف عيطات العويل

انواعي كل من راقد ودافي ................................ جاء يلاي مالبخت الهزيل

يامولاي قربهم اولافي....................................... عبدك ذاب ماعاد فيه حيل

من طرف **العاشق الصغير** 2012-09-27, 6:36 pm

وين نقول انشيل رحيلي
ما تا بيلي
اتديري لي نقناق تسيلي
*****
اتديري نقناق
تقولي ما نحمل لفراق
ونا كيفك راني مشتاق
ولو تلقي لي
يا عين دباره قولي لي
***
تقولي محبوب
امفيت عليه ايخيل الصوب
ونا حالف ما نخش دروب
الا بدليلي
ومنين دليل تجيبي لي

****
تديريه محاس
تقولي ريدي دون الناس
وناعندي للحب قياس
ان غاب رسيلي

******

تقولي نبيه
ومن مدات نراجي فيه
ونا خايف لو نشقى بيه
انقول خليلي
ينقص ما يابا يوفي لي

****
اديريه سريب
ويلفالك دمع وتسكيب
ولجروحك ما القيت طبيب
احتار دليلي
وأنتي ما بيتي ترثيلي

من طرف **العاشق الصغير** 2012-09-27, 6:38 pm

ياريت مارينـــــــاك
عندي العقل ما يحمل نهار بلاك
ويش درتلا

خديــــــــــــــت أذنـوبـــــــــــــــي
بينـــك وبيــن الله يا محبــوبـي
نا كنت متريح وعايش دوبــــــــي
ويش جيبك ويش جابنــي يالاك
نين بالغلا تميت داي وصـوبــــــي
ولازم عليا نجبدا مـــدعــــــــاك
وتميت قوتي وانت هومشروبـــــي
وما نريــد فالدنيا أمفيت أرضاك
وتميت صيدي ونت هو مطلوبـــي
وطاش أنضــاري يا عزيز وراك
تلاقن أسلوبك فالحياة إسلوبــــــي
واللي تحس بيه انحس بيه معاك
وعارف أدروبك خاطيات أدروبــي
وعارف ضناي امواسين ضنـاك
وما زلت في شانك انحت أجيوبـي
ومازلت ماسـك فيك ما ننســـاك
وما زلت في شانك انشن حروبــي
ونعـادي جميع الناس في سباك
يا قرعتـي ياقسمـي يا مكتوبـــــي
جابك الله وجيت ما نخطـــــــاك

من طرف **العاشق الصغير** 2012-09-27, 6:40 pm

وين الغالي غاب بكيـــــــــــنا ما استحينا حتي ماللي شامت فينا
وين الغالي غاب ذرفــــــنا دمع نزفــنا سال اوما حوتـك نشـــــفنا
نين ابقي طيفـــور جرفـــنا جاء طرحينا يدلــف ما خلى تركــــــــينا
ماللي فالغيات عــــرفـــــنا صدفة جــينا حبيناه اوهــو هــاويــــــنا
حول اللــه الياس كسفـــنا نـين ابقــينا في حالة تكداي اوشيـــــنا
من يوم اللي غاب ايشلّـــن نين انعلّـــن لنظار اوماحاجــة حلّــــــن
مامن هود ابدمعه ملّــــــن لاجل زيـــنا ما تنهان اخصوص عليـنا
لا لعباً بيها وسلّـــــــــــــن لا لشــــــينا عمر انظاري ماحـن بيـــنا
مازالن مسع شي ملّــــــن لا تهويــــنـا ساهل عالنظار القــــــــينا
نا قالتلهن صوبه خلّــــــن هيا بــــــــينا نمشوا لاحانــت غاشـــينا
فيه بنات اصغار اجلّــــــن كي مريــــــــنا من قــدام البـــيت لفـــــينا
لكن ظلني وانظلّـــــــــــــن نين القــــينا عين اللي هامـــل قبلــــينا
غالي غاب اونحــــنـا رانا
مانا للفرقة حمـــــــــــــــاله
كيف ايغيب اللي غـــــالانا
نبقــوا نشّالـوا عالحالـــــه
لانا للصاحب خوانــــــــــه
لا فيه انديروا الرزالـــــــه
واللي بفعاله كافــــانــــــه
كانن زين اينــال امثالــــه
ونكاناً عيبه وعفانـــــــــه
صاعين الصاعه درنالــه
نحن مشهورين نبانــــــه
مانا للصاحــب زروالـــة
بنايين وسيع اركانــــــــه
بيـت انتاق اتقـول وكالـة
تاجد فيه اللي عصرانــه
بنت اجـواد اتقـول غزالة
ربت ناس اصحاب امـانة
ركابين ع ام انعــالــــــــة
حمايين اللي حنــــانــــــه
ما تنســـاق الها رجالــــة
حظارا لاجوا غزيــــانـــه
كلتم جا فــوق اسلالــــــة
كالفة خيرة جظـــرانـــــه
حدرها عالنــــار قبــالـــه
ما هاب الغازي نيشانـــه
لاصــوب ظــربه قتــالــة
عزوى للقود وجيرانــــه
فارسم يفــرق بفـعالـــــة
لا يغلط لايدير شطانـــــه
لا هـو للسيــه حمــالـــة
والمهنه كسب الشعنانـه
بيها فالخـالي عـــوزالة
ونروّح عامد معطانـــــه
مالمصــدار لفاء ابعجالة
لاوصلت دارن حيرانــه
لعبه كي ميــز الخيالـــة
غير هذا ماهو عنوانــه
عقلي لا هذي في بالــــة
عقلي من حوس جرنانة
غاب اللي له كـان دلالة
عقلي نا شاطناً نيرانـــه
من ياس اللي لاوي شاله
نين ابقي هكي مطرانــه
مجبورين علي هالحـــالة
يكثر كل نهار ابكانــــــه
كلتنا واخـــذله دالـــــــة
حال اللي قائد فارسانـه
جاته قـوم اوخذ برجالة
حال الحايل في غيطانـه
جاته جور أعزق عالجالة
حال اللي داروا بنيانــه
عالــــي طال افاق علاله
ماليارات علي أبنيانـــه
خسروهــن خاطي عمالة
في لحظة طاح اوسكانه
ماتوا نسوان اورجـــالة
هذا حال الصوب امعانه
نا ومناي غلانا دالــــــه
ياس اقراري منه يانــه
خرّب غيتــــــــنا بعمالة
لكن مهما صار افلانــه
فيها ما نرضى بطـــــالة
وبعهد اللي كان امعانه
هلي لا يعني ابجمـــــالة
وافي ونكمل ممشانـــه
نين ايكون غني بعيـــالة
ونهان ايهون اللي هانــه عقلي ما يرظى الزلالــــــة
مازلت انراجي مالقانــــه يمكـن حينــا موعدنا فالصوب ايجـــينا
يامول الجمة ريانـــــــــه تقهر فيــــنا بيها ياغالي رازيــــــــــنا
والمشية تمشي ابرزانـه وين إتجــينا تدوي لكن بتجعويـــــــنا
ياللي رينا فيـك دوانــــه تعبتــــــينا روفي عالحالة وعلـــيـنا
واختاري ياحـد امنانـــه يافكــــــينا من قصت حبــك هنـــــينا
يكفي هلي منهم جانــه طايل فيــنا دي الناس كثيـــر ايجـينا

من طرف **العاشق الصغير** 2012-09-27, 6:59 pm

!!! كأس لفراق شربته !!!

كاس الفراق اشربته مدوه فى غفله دواي احسبته

(( ياويلهـــم ))

اشربته كله ثاريته طبيبى بقهرتى يسلى

متعاون مع الحساد منه لله ونا حالته رايف اللى تعبته

وهو زاد يصنع ايقوله اسمله فيده الكاس ونا قريب اقربته

قال بالشفا ماتعقب ولا بله ونا امصدقه ماعمر شي كذبته

سقاني ونحسابه دوا للعله وكم كاس عيني الغافله شاربته

دوا يحسابه وعقلي ايتبع فى اريا طبابه !!

سقاه كاس متعبي اروي بعذابه ونا عليه مطامن وله سيبته

ثاريته طبيبه غير يسلابه طبيب مرتشي ياريتني ماجبته

طبيب مرتشي تبع اللي خرابه وقالي الدوا فى غيركم جربته

وهو داي جاهلهن جميع اسبابه ابر ع العدم جرحي بعد سيبته

عطاني الكاس في غفله بروحي مامعاي الناس !!!

سقاني طبيبي وقالى لاباس هضا دواك اللي زمان طلبته

ماتقول عمره نار لوعه قاس لا دار غيه فى الحياة امعذبته

لا تقول عمره م الفراق انهاس ولا عين سالت دمعها ساكبته

ولا تقول باني فى المحبه ساس ولا هي الحياه في مامضى تابعته

لا تقول عمره ضاق قهر الياس ولا هي الدنيا مرها امشربته

من طرف **العاشق الصغير** 2012-09-27, 7:14 pm

يانــــــــــــا الليله .............

يانا الليله .... جانا خبر قديم دار اعويله .... عليك كاينه ياناس

أخباره جني ** وقالو قديم بعيلته متهني
** عطيته غلا واجد وخيب ظني ** ساهر علي سبّاه مامن ليله
** وماغيبته نحمل دقيقه عني ** وان كان هو تأخر نا اللي نمشيله **
ارياف وحنين وشوق له جابنّي ** ولساعة الملاقا ما انغيب حيله **
ماكنت نحسب فالظهر يطعنّي ** بعد عهد واثق فالغلا عاطيله **
وقلة الخير لا نعرف ولا هي منّي ** بالخير والسعادة والهنا ندعيله

من طرف **العاشق الصغير** 2012-09-28, 2:29 pm

حــــالي حـــــال مـن فــاقد حبيبــه.. و دمع العــين ماطفــا لهيبــه

حــالي حــال مــن فاقــد ونــس .. وطــول الليــل مالحظــة نعــس
كما الملذوغ في اوهامه يحس.. يبات في حال .. بنوصفها صعيبة
كــأنــه يــاس شمعــاته طمــس .. كابــر داه فــي غيــبة طبيبـــه
يكمــي دوم في اوجاعــه يـدس .. لين ف يوم صــارتله غريبة
عقــاب الليـل ف اوهامه اغطس .. اصحابه السو جابوله سريبه
شـــاف سراب قدامـــه دعـس .. كما المخلــوع يحسابه حبيبــه
عيـــط ويـــــــــن! يا اطيب نفس.. ليــا عــود ماطوّل الغيـبة
و ويـن الفجر بانواره بقـص ..رجع مليوع و دمـوعه سكيبه
قالوا النــاس بالكــشي التبــس ..جابو الشيـخ مانفعـت كتيبـه
و هـوا داه فـي ريــده وبــس ..هاللــي قبــل يحسابه نصيبه
هاللــي ف كبدته خنجر غـرس.. مشي خلاه مولايا حسيبه

حالــي حـــال من فاقـد منـاه .. هاللـي قبــل مايصبــر بــلاه
هاللـي خــان خيبــله رجاه.. قــال اقســـام و الدنيــا كتيبــة
جُــوه اصحاب قالولـه انسـاه .. من المحال دمعاتك اتجيبه
قالهـــم :كيف؟ مالكــني هــواه ..زهْو العمـر وايامً رهيبة
هوا الفرح و الشووق و شقااه .. و هوا داه قلبي و المصيبة
هوا الحِــن في ساعــه القاه ..هــوا قلب فايــض دوم طيبة
غير الوقت من عني قساه ..ولولا الوقت مايظهرش عيبه
قالوله خلاص ...
اليوم انساه بو سالف اكداس
مشـي للغيــر داروله اعـراس .. زكــرة و طبـل واصـوات صخيبه
فــقد الــوعي و فقــد الاحســاس .. لعنـد اليـوم عايـش كـي ذهيبــه
يا مــولاي يا خـالق النـاس .. بحــاله روف ياعـــلام غيبــه

حــالي حــال من فــارق حبيبــه .... و دمـــع العيـــن ما طفـــا لهيبــــه

من طرف **العاشق الصغير** 2012-09-28, 5:59 pm

اليوم أوحدي
.

اليوم اوحدي
خانوا الغوالى من اطياح اسعدي
عايش بلاهم

اليوم ابروحي
... شايل عذابى او حيرتى وجروحي
زعـــــلان من حبان كانوا روحـي
تـمــــوا شقاء عمرى وكل انكدي

غابوا عني
هلى الغلا والــــــود نالوا مني
ندعــــى عليهم خاطرى متمني
ماخير يلقوا كــان حبوا ابعدي

من طرف **العاشق الصغير** 2012-09-28, 6:33 pm

هبا م الليل وجرنانا ,, جايب جانا ,, طيف اللي موحه كدانا

هابا م الليل ومطراه ,, يجيب معاه ,, سريب اللي طول مرجاه
منيدي خطم ياس خذاه ,, برم خلانا ,, ف اوهام الغياب حزانا
جيوشه حالن بين دناه ,, وفيه رزانا ,, طيفاً كان احدود منانا
انكمل ف الليل امهاياه ,, الدمع ملانا ,, ع الخد ايقجن غدرانا

هبا م الليل وتعذيبة ,, فيه الريبه ,, وفكار ورايات عطيبة
نجبد في موحه وسريبه ,, منّه دانا ,, وين اعلقنا فيه رخانا
جرحه ف الخاطر نشكيبه ,, ما هنانا ,, كي يدمى يا طول شقانا
ما نفعت فيه التطبيبه ,, لا كويانه ,, منا مقطوعات الوانا

هبا من جرنان الليل ,, بعد يلفى يا طول شقاي
نشعر ونهاجي ونشيل ,, الصوت علي تبوزيع غلاي
ايديرن فوق اخدودي سيل ,, ايقجن قلالات هناي
يخطر بو مشي اتزعبيل ,, ايجي يدودش من يالاي
جميل وفيه الوصف ايخيل ,, قمر كان امضوي دنياي
بو ميم اتقول قرابيل ,, ايضرن كان التفتن جاي
بو مضحك فيه اتشهليل ,, ان كان تبسم يبرا داي
سبب فرقاهم قال وقيل ,, سمع سهراية ناس اعداي
قالوا له فيّ مقاويل ,, تبعهم ما شاور ف الراي
رقد واصبح ناوي ع الشيل ,, حلف ما يقعد يوم احذاي
رحيله ساقوه معاجيل ,, الحقته عيط ياس وراي
جرحني بو ممشوط طويل ,, وخلاني غاطس ف ادماي
متشوكل فيه اتشلشيل ,, الجرح اصاعب ع الداواي
علي جرحه ما عندي حيل ,, انجض وهذا حد عزاي
الخاطر منّه راح دقيل ,, وزاد افراقة قل هناي
لنا ما دز مراسيل ,, ولا ينشد عنا ف الجاي
نصبر كان الصبر جميل ,, بعد لخوانا ,, من ناساً كانوا مشكانا
هبا م الليل وجرنانا ,, جايب جانا ,, طيف اللي موحه كدانا

من العاشق الصغير إلي كل ألاعضاء والزوار

من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار

رد: من العاشق الصغير إلي كل ألاعضاء والزوار